1089/2024-2025

Aizawl, July ni 6, 2024: Vawiin hian Mizoram pumah MHIP Day kum sawmngana puala hun hman a ni a. Aizawlah chuan AR Ground ah a lawmna pui ber neiin, khuallian Minister Pu K. Sapdanga hovin hun hman a ni. Health & Family Welfare Minister Pi Lalrinpuii chu khualzahawm a ni bawk.

Minister Pu K. Sapdanga chuan kum 50 chhunga MHIP in social work lama hna ropui tak an thawh avangin lawmthu a sawi a. Mizorama tlawmngai pawl lo piangte chu missionary te hrin an ni tlangpui a,  an thil tum te, an thiltih thin ah te mahni mihringpuite thatna tura rawngbawl sak a tel vek thu a sawi a. Khawtlang thatna atana hmalak danah pawl pakhat tan a thawh remchang, pawl dangte tana remchang lemlo te a awm thin thu sawiin Pu K. Sapdanga chuan MHIP chuan YMA leh MUP te tan a tih rem silo hna pawimawh tak tak – crèche te, anganwadi te, awareness generation project chi hrang hrang, family counseling te – Mizo Hmeichhe Insuihkhawm Pawl in tlawmngaia tha leh zung senga an neih ang ang sum leh pai senga an hnathawh a nih thu sawiin, sorkar sum senga thawh tur ni se a man a to hle tur thu a sawi a. Minister chuan heng social work ropui tak tak an thawh avangin leh lamah hospital, jail, home leh hmun dang dangah luangchhuakin theihtawp an chhuah avangin MHIP hruaitute leh member te chungah lawmthu a sawi a ni.

Khuallian chuan khawtlang nunah leh chhungkuaah Mizo hmeichhiate chu hmahruaitu an nih thu sawiin, zirna lamah a ni emaw, eizawnna kawngah te hmeichhiate tello in sorkar a kal thei tawhlo a tih theih a ni, a ti a. Khawtlang nun venhim kawngha pawh hmeichhiate chu sulsutu pawimawh an nih a ngaih thu a sawi a. Mizoram chu kawng tinrengah siam that a ngaih thu sawiin, kan tu leh fa te luah tlak ram a siam tur chuan vawiinah kalkhawmte chu hmahruai theitu an nih thu a sawi a ni.

Khualzahawm Minister Pi Lalrinpuii chuan MHIP in kum 50 lai mai tluang taka a kal chu a lawmpui thu a sawi bawk a. Tun hma lamah Mizo hmiechhiate zinga chhan ngai, tanpui leh humhalh ngai ngawih ngawih an tam thin thu leh, tunhnu ah chuan Mizo hmeichhiate dinhmun a that tawh viau thu saiwin, heng hi MHIP in a langsar leh langsar lo ah pawh hma a lakna zar a tih loh theih loh thu a sawi a. Hetihrual hian hmun thenkhatah, a bik takin state pawn a hnathawk tura kal zingah Mizo hmeichhia harsatna tawk an awm thin thu leh, hmasawn zelna tur a awm tih hriat pawimawh a tih thu a sawi. Minister chuan  Mizo Marriage, Divorce, and Inheritance of Property Act, 2014 kan nei ta te, khawtlang inrelbawl naah hmeichhiate tan reservation siam a ni a, chutiang dinhmun luahtute’n an mawhphurhna tha taka an hlen zel thei chuan nasa takin hmeichhiate hmasawnna a lantir thu a sawi a. Khawtlang leh chhungkua ah dinhmun pawimawh tak tak hmeichhiate’n an lo chan hian mawhphurhna a ken tel lian tak takte chu hriat tel reng pawimawh a tih thu a sawi. Minister Pi Lalrinpuii chuan ruihhlo avangin kan hnam a damlo a ni, tiin sorkar, kohhran leh NGO ang zawng te pawhin nasa taka ruihhlo do a hmalak a nih dan a sawi a. MHIP member kalkhawmte hnenah chuan ruihhlo do turin chhungkua atanga bultan a pawimawh thu a sawi a. Chhungkua ah naupang leh thalai ten awm nuam ti se, ruihhlo bawih ah tang lo turin kan fa te kan chhanchhuak thei ang, a ti a ni.

Vawiin AR Ground-a MHIP lawmna inkhawmah hian Pi Lalhriatzuali, Director, Social Welfare & Tribal Affairs Department leh Pi Zoramthangi, Director, Women & Child Development te pawhin thu an sawi a. Khuallian hian Souvenir a tlangzarh nghal bawk a ni.