1088/2024-2025

Aizawl, the 6th July, 2024: Sesawng Branch MHIP buatsaih MHIP Day vawi 50-na lawmna hun, Sesawng Venglai Community Hall-a hman chu vawiin khan Mizoram Speaker Pu Lalbiakzama, Chalfilh bialtu MLA ni bawk chuan khuallian niin a hmanpui.

Khuallian Mizoram Speaker Pu Lalbiakzama chuan kalkhawmte MHIP Day chibai bukin kum 1974 a din MHIP-in kum 50-na hmel a hmu chu a lawmpui takzet thu a sawi a. Sub-Hqrs. 7 leh branch 744 nei mek MHIP chu mizo hmeichhiate tihmasawn tura din a nih tih sawiin, "MHIP hi awmlo ta se chu kan ram hmeichhiate dinhmun hian tun aia ropuina hi a thleng pha kher lo ang. MHIP te hnathawh hi hmeichhiate tan chauh ni lo, hnam pum ang pawha hlu tak a ni a, a tangkaina hi kan hlut thiam deuh deuh pawh a pawimawh hle a ni," a ti a. MHIP member-te chu nu hlutna leh kan hnamin eng ang mize pu nu nge a mamawh tih hre thar theuh tura chahin, nute chu In chhunga an hming lam nasat ber, mangan vawrtawp, na tawrh chang, hlim leh lungngaih ni a lam rawn ber an ni a, hei hian an pawimawhzia chu chiang takin a tarlang a ni, a ti bawk. 

Speaker chuan nunkawng zawha inzir chho mek naupangte'n nu uapna leh kaihhruaina an mamawh zual bik thu leh an hmuh phaka nute an awm reng a tul tih sawiin, "Nu hmangaihna nena enkawl naupangte chu an puitling bik a, hmangaihna awmzia an hrethiama, inrintawkna an nei bik thin a, nu enkawl loh naupang erawhin hmangaihna an khawpkham lo a, an nunah hmun ruak, nu hmangaihna lo chuan a hnawhkhah zawh loh an nei a, an hriatthiam loh nun khawharna an thanlenpui avangin an damchhungin an nun a pangkhing tlat a, an nih tur an ni pha ngai lo a ni," a ti a. Nu hlutna vawn nun kawngah a hnam anga harh a hun tawh takzet thu sawiin, fate hmuh phaka awm turin In chhungkhur luahlum that a pawimawh a, hemi tur hian khawsak phungah pawh kan inherrem thiam a tul a ni, a ti a. In chhunga nu lo awm ringawt pawh chhungkaw tan a buk tawk rangkachak aia a hlut zawk thu a sawi bawk. 

Chalfilh bialtu MLA ni bawk Pu Lalbiakzama chuan loh theih lohna avanga In chhuahsan ngaia eizawng thin nute chu hna thawh bak In chhungkhur chhuahsan lo tura fuihin, fate an puitlina ei an zawn theih hunah rawngbawlna dang hman deuh zawka an la kalpui theih dawn thu a sawi a. Chhungkaw sum leh pai dehchhuah bakah renchem taka hman kawngah nute an pawimawh dan tarlangin, pasalte thawh chhuah mil tawka khawsak rel thiam tur leh neih phak loh awt mai lova, inkhawl nachang hre turin a fuih bawk a. Hnam anga dinchhuahna turin mizo hmeichhiate'n an pawimawhna leh an kova tla mawhphurhnate an hriat a tul thu sawiin, "Khua leh tui tha nihna hi mahni chanvo um chakah a innghat ber lova, mahni mawhphurhna hlen lamah zawk a innghat lian em em a ni," a ti a. MHIP member-te chu an pasal fanaute'n  khawvela mi thianghlim ber hmuha an hmuh theih nana tan la tura fuihin an kalzelna turah duhsakna sang ber a hlan a ni.

Vawiin MHIP Day lawmna hun hi Pi Lalruatzeli, Sesawng Branch MHIP President chuan kaihhruaiin Pi Dengchhingpuii, Committee Member-in hunserh a hmang a. Secretary Pi Laldinthari hnen atangin report ngaihthlak niin, MHIP Day puala Hqrs. thuchah Pi Lalthlanpuii, Branch Asst. Secretary-in a chhiar chhuak a. Adviser Pu Ralthansanga kaihhruaiin member boralte sunna hun hman a nih hnuah Pi Linda Vanlalhruaii, Branch Committee Member kaihhruaiin thuthlung sawi rual a ni a. Pi Lalngaihzuali, Vice President hnen atangin thusawi ngaihthlak a nih hnuah Pi Lalhlimpuii, Fin. Secretary-in lawmthu sawiin chawhma hun hman a khar a. Chawhnu lamah MHIP Day pual variety programme hun hlimawm tak hman chhunzawm a ni.

Sesawng Branch MHIP hi kum 1978 ah din niin, tun dinhmunah member 1060 an awm mek a ni.