26th Mini-National Volleyball Championship, 2018, R.Dengthuama Multipurpose Stadium, Aizawl-a ni 28.4.2018 thil thleng chungchang sawiin, Home Minister Pu R.Lalzirliana chuan a dem thu a sawi.
He Championship khelhnaa Mizoram leh Manipur inkhelh tum hian Manipur lampang chu Referee hian tan deuh ni a an ngaih a vangin inkhelh banah inhnialna awmin tu tih hriatloh mi pakhat chuan Manipur Team Skipper Sakil Chesam chu kut a thlak a, amah hi Aizawl Civil Hospital-ah hruai niin Director ten anlo en hnuah tha a ngaiin an chhuahtir leh nghal a, anni hian duh tawklo in Greenwood Hospital-ah kalpui leh in X-ray te tih a ni a, a khabe ruh tliak awm ni a hriat a ni a, tih Home Minister chuan a sawi.
Home Minister chuan kan hospital lian berah X-ray a lo nilo hi pawi a ti hle a, tun hnuah fimkhur tul a tih thu sawiin thenkhat kut hlei avanga state leh state inkhelhna ah hetiang a thleng hi Mizoram tan zahthlak a tih thu a sawi. Hemi chungchang hi mitin in fimkhur nan hman a nih theih nan leh a thlen leh tawh loh nan Police ten he kut thlak tu hi an man ngeiin, a phu tawk hremna an pe tur a ni tih Home Minister chuan a sawi bawk.
