Nimin (2.5.2018) khan Gram Swaraj Diwas (Village Self-Governance Day) chu Lawngtlai DC Conference Hall-ah hman a ni a. Sawrkar official-te, tlawmngai pawl ai awhte leh zirlaite kal khawmin, sawrkar scheme thenkhat kalpui dan ngaihthlak ho a ni.

He hun hi Lawngtlai DRDA Project Director Pu R. Lalremsanga MCS chuan kaihruaiin, hun hman a nih chhan a sawi fiah a. Thingtlang khaw mite’n kawng tinrenga hma an sawn nan sawrkar laipuiin ruahmanna hrang hrang a nei a, chu’ngte chu a hlawhtlin vek theih nan theih tawp chhuahin, a hma laknate mipuite hnena zau taka puanzar a duh a ni, a ti.

He hunah hian Lawngtlai District chhunga sawrkar laipui scheme palia hma lak dante ngaihthlak a ni a. PHE SDO Er Mangliandinga chuan Swachh Bharat Mission (Gramin) hnuaia an hma lak dan sawi fiahin, P&E EE Er R. Lalchhanhima’n SAUBHAGYA scheme hnuaia in tina eng pe tura hma an lak mek dan a sawi a. DRDA-a Works Manager Pu Lalremruata’n MGNREGA hnuaia an hna thawhte sawiin, APO Pi Lalramliani chuan PMAY-G hnuaia mi retheite in an saksak dan a sawi a. He’ng bakah hian he scheme chi li chhawrtute atangin thu sawi ngaihthlak theuh a ni bawk.

Lawngtlai District chhunga block tin atangin sawrkar ruahmanna kalpui kawnga ti tha khua thlan chhuah niin, lawmman sem nghal a ni a. Chawngte Block-ah Nalbunya, Bungtlang ‘S’ Block-ah Hmunnuam, Lawngtlai Block-ah Ngengpuikai leh Sangau Block-ah Cheural khuate chu sawrkar scheme hrang hrang tihlawhtling tha ber khuaa thlan an ni.