Assam Rifles buatsaih National Interactive Tour a kal tur Mizo zirlai 14 leh zirtirtu 2 te chu vawiin khan Home Minister Pu Lalchamliana’n Aizawl-a 46 Assam Rifles hmunpui atangin a vailiam. Heng zirlaite hi Mizoram hmun kilkhawr ber ber atanga thlanchhuah niin India ram inpumkhatna chawisanna leh ramchhung hmasawnna hrang hrang an thinlunga tuh a nih theih nan ruahman a ni.

He hun puala inkhawm buatsaih ah Home Minister Pu Lalchamliana chuan thusawiin, Assam Rifles in zirlaite hmakhua ngai tak chunga National Interactive Tour an buatsaih chu thil lawmawm tak a ni a ti a, hei hian zirlaite leh mizo thalaite a chawh phur a beisei thu a sawi. Zirlaite zin chhuak chuan India ram ropui tak chanchin leh hmasawnna hnathawh hrang hrang an belh chian a, an hmalam hun leh an nunkawngah a tha zawnga nghawng a neih ngei a beisei thu a sawi a, Mizoram leh mizo hnam aiawh in an kal a ni tih in hre reng a nungchang mawi tak pu tur leh hlawkna rawn char haw ngei ngei turin zirlaite a chah a. Sipai hmunpui hrangbhrang an tlawh tur chu an vannei tih sawiin Mizo zingah India sipai officer an tlem tawh thu sawiin sipai hna hi hna ropui tak a ni a, an tawnhriat tur ten sipai pawimawhzia an nun ah tuh nghet se, sipai ah a tam thei ang ber tang se  a duh thu a sawi a ni.

National Interactive Tour hi December ni 2-14, 2019 chhung neih tur a ni a, zirlaite hian Delhi, Dehradun leh Mussorie te an tlawh ang a, heng hmuna zirna in tha leh hmingthang tak tak te an tlawh bakah Indian Military Academy, Dehradun-a sipai officer training zo te Passing Out Parade an chhim dawn a, Mussorie-a Lal Bahadur Shastri IAS Academy bakah ITBP Academy, Forest Research Institute an tlawh ang a, thalaite khawvela mipawimawh chi hrang hrang an kawm bawk ang.

Assam Rifles hotute chuan National Interactive Tour chu zirlaite leh mizo thalaiten an hlawkpui an beisei thu sawiin, an hmalam huna eizanna kawng hrang hrang an zawh turah an rilru a tha zawnga a kaihhruai bakah India ram inpumkhatna vawng nung zel tura an rilru an siam beisei a nih thu an sawi a ni.