Vawiin khan Mizoram State AIDS Control Society (MSACS) bultumin Vanapa Hall ah World AIDS Day hmanna programme buatsaih a ni a, he programme hi Health and Family Welfare Minister Dr. R. Lalthangliana’n a hmanpui a ni.

Health Minister Dr. R. Lalthangliana chuan Mizoram in India ram pumah mipui cheng zat chhutin HIV hrik pai tam berna state dinhmun a luah mek chu a vei hle thu sawiin MSACS emaw, Health Department emaw kut chauh a ni theih tawh lo thu te,  kan zavaia ngaituahna  sen tlan a, beidawng lova, a tlemna turin kil tin atanga theihtawp chhuaha bei tlan a ngaih thu te a sawi a. Kohhran hruaitute, tlawmngai pawl hruaitute leh doctor pawl te tunhnaia he thila a kawmnaa, HIV/AIDS dona kawngah theihtawp chhuaha tan lak an tum thu a dawn leh an thahnemngaihna a hmuh te chu a hluin a lawmawm a tih thu te pawh Minister hian a sawilang a ni.

Dr. R. Lalthangliana chuan HIV/AIDS chungchang a sawi zel na ah HIV in retheihna nasa takin a tipung theih thu sawi langin hrisel lohna, retheihna leh harsatna namen lo thlentu, hnam suattu HIV darh nasa lutuk hi ngawihpui mai mai chi a nih tawh lova, kan hnam mang mai tur hi a rama chengte leh a ram neituten thapui thawha tan kan lak theuh a ngai a ni, a ti a. HIV chu nungchang kaihhnawih natna a ni ber tia sawiin nunphung hrisel leh him in zirtir a, a kai lo zawnga nun inzirtir a pawimawh thu te leh a kai tawhte pawhin midangte kai lo turin an inven a tul thu te pawh a sawi tel bawk a ni.

Health Minister  chuan khawtlang leh Kohhran hruaitute  leh mipuite pawhin HIV in kawng hrang hranga ram leh hnama nghawng a neih dante ngaihvena, ngaihtuahna seng tura sawmin kan ram leh hnam chhan tur leh siam tha turin tang tlangin a dona kawnga pheikhairual takin ke pe tlang ang u tiin mipui te a chah bawk a ni.

Thusawitu dang Health & Family Welfare Department Secretary Pu H. Lalengmawia, IAS chuan khawtlang leh chhungkua anga tan tlana HIV do a tul thu te, nu leh pate tan kawng engkima an fate tan entawntlak nia nun a pawimawh thu te leh Bible leh Pathian thu chu pawn lang chauha hre lova nitin nuna nunpui a ngaih thu te a sawi a ni. Dr. Chawnglungmuana, Secretary, Doctors Against HIV/AIDS (DAHA) chuan medical community anga HIV dona kawnga tan an tum dante sawilangin DAHA pawl a din theih nana Health Minister in theihtawp a chhuahpui na ah lawmthu a sawi a. Mizoram bik thlur binga State AIDS Control policy a hranpa a neih tha an ti chu Minister in a phurpui naah lawmthu an sawi bawk a ni. Dr. Lalthlengliani, Project Director, MSACS in lawmthu sawiin hun a khar a ni.

World AIDS Day hi 1988 atanga hman tan niin kumin thupui atan ‘Communities make difference’ tih hman a ni a. HIV/AIDS dona leh tih tlemna kawngah khawtlang mipuite huap zo hmalakna pawimawh zia zirna kumah kumin hi puan a ni.