No.2889/2021-2022

Aizawl, the 5th November 2021 : Vawiin khan Home Minister Pu Lalchamliana, Disaster Management & Rehabilitation enkawltu ni bawk chuan Directorate of Disaster Management and Rehabilitation Chawnpui a tlawh a, hetah hian Department-in Mizoram State Disaster Management Plan 2021 leh Kolasib District Harzard Vulnerability Analysis lehkhabua an buatsaih chu a tlangzarh nghal a ni.

Home Minister Pu Lalchamliana chuan Department a thawktu te chu tlemte nimahsela inlungrual taka hna thawk zel thin tura fuihin mahni dehchhuah ni lo, mahni thawhchhuah ni lo leh mahni hlawh ni lo te chu i it lovang u tiin a fuih a. Hengten a hrinchhuah chu diklo taka thil tih leh kawng hrang hranga hleprukna te niin a sawi. Eng hna pawh thawk ila ram leh hnam siamna kawngah tih loh tur kan ti thin em tih hi kan inngaihtuah leh kan inzawh fo a ngai a ni, a ti a. Inrelbawlna administration chungchang sawiin dan ang thlapa kal mechanical approach aia dan hrula, dan bawhchhe si lova, midangte tanpui duhna rilru neia kal humanistic approach hi miin an tangkaipui zawk fo tiin mipuite tanpui duhna thinlung leh a taka mipui te puih duhna rilru pu reng turin Department a thawkte chu a chah bawk a ni.

Minister chuan Mizoram State Disaster Management Plan 2021 pawimawhna sawiin mumal leh tha zawka chhiatrupna a thlen thula chet lak dante, senghawi hna thawh dan te, chhanchhuahna hna thawh dan te leh chhawmdawl hna thawh dante a kawhhmuh chu Plan tum ber anih thu a sawi a. Mizoramin tlawmngai pawl tha tak tak, abik takin YMA kan nei te hi kan vannei hle tiin chhiatrupna leh khuarel chhiatna a thlenin a che hmasa pawl an ni zel thin a, khawtlang leh Police ten hemi kawnga an thawhhona hi a fakawm nia a hriat thu te a sawi bawk a ni.

Mizoram State Disaster Management Plan hi National Disaster Management Authority ten kaihhruaina an siam ang a kimchang tak a siam a ni a. Kum 2007 atanga siam tan niin, vawi 6 lai ennawn a siamthat ngai lai te siamthat a lo ni tawh a. Mizoram State Disaster Management Plan 2021 hi National Disaster Management Plan 2019 zulzui a siam that leh a ni. He Disaster Management Plan ah hian chhiatrupna a lo thlen thulh a Mizoram Sawrkar hma lak dan tur te, department hrang hrang te thawh ho dan tur te tarlan a ni bawk.

Kolasib District Hazard Risk Vulnerability Analysis ah hian district in khuarel chhiatna a tawrh theih te, district chhung a hmun hma leh thil tul dang khuarel chhiatna a lo thlen thulh a hman tangkai theih te tarlan a ni bawk. Hazard Risk Vulnerability Analysis hi Aizawl District, Siaha District leh Lawngtlai District tan siam a ni tawh a. District dang tan pawh siam tur a hmalak mek zel a ni bawk.

Programme hi Pu John LT Sanga, Director, Disaster Management and Rehabilitation Department in a kaihruai a, Pu Vanlalngaihsaka, Secretary, Disaster Management and Rehabilitation Department pawhin thu sawina hun a nei bawk a ni.

Pu Lalchamliana, chuan State Emergency Operation Centre hnathawh dan te leh vanduaina rapthlak a lo thlen thulh a hman tur chhanchhuahna hmanrua Disaster Management and Rehabilitation Department ten an neih chu a enpui nghal bawk.