No.2888/2021-2022
Aizawl, 5th November, 2021 : Vawiin khan Aizawl Mayor Pu Lalrinenga Sailo leh Dr. Prahlada Ramarao (Padma Shri Awardee 2015), Pro-Chancellor & Director, Center for Energy Research te Mayor Office-ah inkawm chuan Aizawl leh a chhehvel awlsam zawka inkalhpawh theihna tura Air Balloon hman chungchang an sawi dun.

Dr. Prahlada Ramarao chuan North East India chu tlang ram, inkalpawhna kawng leh railway leh airport siam hautakna hmun a ni a, a enkawl zui pawh a harsat avangin inkalpawhna hmangrua dangdap tel a tul thu a sawi a. Helicopter hi a that viau rualin a hman man a to a, a bengchheng bawk a, chuvangin man tlawm leh him zawk, khualzinte (tourist) hip thei tur ni bawk leh environment tan pawha pawilo tur Air Balloon hmanga inkalpawhna hi Mizoram tan a tangkai hle tur thu a sawi. Air Balloon hi Mizoramin a hmang thei a nih chuan Emergency thilah leh thil dangah pawh a tangkai hle dawn a ni a ti.

Aizawl Mayor chuan Air Balloon chungchang hi zirchian tha a tih thuin a chhang a, tha taka hman theih a nih chuan inkalpawhna atana hun rei tak hman thinte pawh a tihziaawm theih a beisei thu a sawi bawk. Aizawl Mayor chuan tourism hmasawnna tura sawrkarin hma a lak thu leh Aizawl khawpui hnaiah tourist-te hip thei tur siam belh a tul thu a sawi bawk.

Center for Energy Research hian inkalpawhna him zawk neih theihna turin research a kalpui thin a, tunah hian Tripura sawrkar nen thawhho an tum mek a. Air Balloon kalpui dan tur Concept Paper buaipui mekin an peih veleh Tripura Dy. Chief Minister leh Aizawl Mayor te hnenah a copy an thehlut dawn a ni. Centre Director chuan Aizawl Mayor-in thla kaltaa Bangalore a rawn tlawh avangin lawmthu a sawi a, Bangalore mipuite leh Bangalore-a Mizo 20,000 chuang awmte nen a tha zawka an thawhho theihna tura a tangkai a beisei thu a sawi bawk. Dr. Prahlada Ramarao hi a nupui leh Professor Lalnundanga, MZU Registrar ten an rawn tawiawm a ni.