No.2887/2021-2022
Aizawl, 5th November, 2021 : Vawiin khan District Development Co-ordination and Monitoring Committee /DISHA, Aizawl District chu Planning & Programme Implementation Conference Hall-ah an thukhawm a. Mizoram Lok Sabha M.P Pu C.Lalrosangan Delhi atanga meeting hi rawn hovin Pu Vanlalthlana MLA, Pu Vanlalhlana MLA te bakah Project Director, DDA leh Addl.D.C Aizawl District te pawhin an telpui a ni.

DISHA meeting ah hian Aizawl District chhunga Centrally Sponsored Scheme kalpui mekte dinhmun tlangpui thlirho a ni a. CSS hnuaia hmasawnna hna khawihtu Lined Department tinte chu he meetingah hian hun pek vek an niin department 19 hnen atangin an hmalakna report ngaihthlak a ni a. An report atang hian hmasawnna tur leh chak zawka tan lak belhna tur pawimawh te sawiho a ni.

Chairman Pu C.Lalrosanga chuan DISHA meeting chu Ministry of Rural Development in an rawtna angin virtual a neih a ni tih a sawifiah a. CSS te hi Mizoram sawrkar leh mipuite innghahna lian ber pakhat a nih avangin covid- 19 hripui karah phei chuan thahnemngai lehzuala tan la turin line department hrang hrangte chu a ngen a ni.