Vawiin khan Home Minister Pu R. Lalzirliana chuan Mizoram Ministerial Service Association (MMSA) General Conference vawi 5-na chu Aizawl, Vanapa Hall-ah a hmanpui.

Home Minister chuan sorkar hnathawk zingah mifel, rintlak leh rinawm tam tak an awm laiin a dawngdah leh awm tha duhlo tlemte avangin sorkar hmai a bal thin, a ti. Ministerial Service-te chu tluang taka sorkar a kal theih nana a fawng pawimawh tak vuantu, file a chinfel ngai thila bultumtu an nih angin an mawhphurhna a pawimawh hle a, sorkar dan leh kalphungte bel taka an thiam a tul a, inzirthar peihloh vang leh thatchhiat vanga mi dang tihtura hna nawr liam mai chingte, mawhphurhna pek belh hlauh vanga hna thiam duhlo tlat an awm thinte chu pawi a tih thu Pu R. Lalzirliana hian a sawi a. Thiamsa a piang tumah an awm lova, a inzir peih apiangin hma an sawn mai thin tiin hotute tana thutlukna siam ti awlsam tura a pawimawh lai thurchhuak leh chhawp chhuak thiam, hnuai a mite rawn tlak, hotute tana chhawr nahawm tak nih tum vek turin a chah a ni.

Pu R. Lalzirliana chuan Mizoram siamtha tur chuan thil dik duh, dik lo erawh huai taka hnawl ngam, zep ruk then nei lova langtlang taka thil ti thin, mahni diklohnaah mahni leh mahni thiam inchantir tuma midang puh kual ngai lo, mawhphurhna la ngam khawpa mahni hna a chiang kan mamawh a ni tih sawiin siamthat ngai siam tha a, felna leh dikna luipui anga a luan theih nan thawhho puiah kalkhawmte a sawm a. Sorkar hnathawkte chu hun vawndik kawngah te, an rawngbawlsak mipuite dah lal thiam kawngahte, mahni chunga mite zahthiam leh hnuaia mite enkawl thiam kawngahte hma an sawn a tul nia a hriat thu Home Minister hian a sawi a. Inthlan hmaa Cabinet thutkhawm hnuhnung berin rem a lo tih tawh Home Department hnuaia post thar siam chungchang pawh a tul ang zela bawhzui a nih tur thu a sawi bawk.

MMSA General Conference hi an Vice President Pu Lalremsiama’n a kaihruai a, an President Pu Lalrintluanga Colbert chuan thu sawiin MJA kaihhruaina hnuaiah hruaitu thar an thlang bawk. Chawhnu chu rorel inkhawma chhunzawm niin an thurel zingah Assistant-te Gazetted Status pek, Contract Basis a UDC lak tawhloh, ACP Vawi thum hmute promotion pek tih te a tel a ni.