Vawiin khan Mizoram-a a hmasa ber ni turin NLUP (Vety Sector) Launching Programme chu A.H.&Vety Farm Complex, Selesih ah neih a ni a. He Launching Programme-ah hian Home Minister Pu R.Lalzirliana chu Khuallian niin AH&Vety Minister Pu Nihar Kanti Chakma chu Khual Zahawm a ni.

 

 

Khuallian Rural Development changtu ni bawk Pu R.Lalzirliana chuan NLUP (Vety Sector) Programme hawnna a thusawiin NLUP Programe bultanna hnarkaitu department ber AH&Vety Department-a thawktu zawng zawngte chu mipui tana hnathawk tur an ni tih hre reng turin a chah a. Programme tha ringawt hi a tawk lova, a hlawhtlinna chu mi rethei ten an tel ngei tur a ni, a ti. NLUP pawh fimkhur taka kalpui tum anih avangin khaw hrang hranga an mamawh dan thlengin enpui an ni a, muang deuh angin lang mahse hei hi fimkhur taka hlawhtling ngei tura kalpui tum vang a ni zawk, a ti bawk. NLUP hnuaiah 60% chu ranvulh lam an thlan avangin a hlawhtlin nan sorkar hmanrua ber tur Vety Doctor leh department-a thawktu zawng zawngte chu missionary tirhchhuah angin tirh chhuah an ni dawn a, NLUP Programme zingah Vety  Sector chu a hlawhtling ber te zing ami a nih tlat a beisei thu Khuallian chuan a sawi a ni.

Khual Zahawm AH&Vety Minister Pu N.K.Chakma pawhin thusawiin NLUP in a tum ber chu mi retheite chhanchhuah a ni a, Vety Sector-ah doctor ten theihtawpa tan an lak chuan he Programme hi a hlawhtling ngei a beisei thu a sawi.