Spastic Society of Mizoram chuan an din champha kum 21 na Founder’s Day tia an vuah chu vawiin khan Vanapa Hall-ah Chief Minister Pu Lal Thanhawlan a hmanpui.

 

 

Chief Minister chuan heng naupang duhawm tak takte hi piangsual an ni lova, pianphunga rualbanlo mai an ni zawk a ni, a ti a. Mizo zingah hian duhamna ah te, chapona te, inngaihhlutna, in hmangaihna te leh thil  dang tam takah piangsual kan tam hle a, an ni te ai hian piangsual kan tam zawk hle a ni a ti. Pu Hawla chuan pianphunga rualbanlo te hi India sorkar-in a ngaih pawimawh thu sawiin, sorkar ah pawh an tan hian dan in a phut angin hmun hauhsak an ni a ti.

Spastic Society of Mizoram hruaitute leh Gilead Special School thawktute inpekna chu ropui a tih thu sawiin, hetiang mi hmantlakte hi kan ram mamawh an ni a ti a an chungah lawmthu a sawi. Spastic Society of Mizoram (SSM) hotu ten ram zau tha tak an mamawh thu an sawi chu Chief Minister chuan ram in pek a harsat thu a sawi a. Tunah pawh hian IIMC, NIT, NIFT etc. te tan ram pek tur te pawh ngaihtuah a tul thu a sawi a. SSM tan chuan ram zau tak chu a tul a ni a ti. Hun lo kal zel turah Bus an mamawh tur thu an thlen pawh pek a remti a ni.

Programme-ah hian naupangten an thiam thil chi hrang hrang an entir a. A enkawltute inpekzia leh an thawhrim zia a ti lang a ni.