Pi Vinita Ranade, External Affairs Division (Journalist), World Bank chuan April 10 -11 khan World Bank-in an fund, Aizawl-Thenzawl-Lunglei kawng a tlawh a. Pu K. Sawmvela, Project Director, World Bank Project, Mizoram PWD leh I & PR Officer ten an tawiawm a ni.

 

 

He kawng-in khua a paltlangte chu tlawh in - Aibawk, Thenzawl leh Haulawng ah te V/C, YMA, MHIP leh MUP hruaitute leh Lunglei a mi sawmbikte nen inkawmhona neih a ni a. Thenzawl ah Pu P.C. Lalthanliana, Minister of State (SWD, LAD) nen inkawmna neih a ni bawk. Lunglei ah vek hian Pu S.Laldingliana, Parliamentary Secretary leh Pi M. Zohmingthangi IAS, Lunglei DC te nen inkawmna neih a ni bawk. Anni hian World Bank kawng chu Chhimphei tlangdunga khua te tan  hmasawnna rahbi thar a niin hmasawnna nasa tak thlentu anih an beisei thu an lo hrilh.

Heng kawng kaltlangna khaw mipuite hian World Bank kawng chu an tan  malsawmna liau liau a ni an tiin mipuite hian Aizawl hi nuamsa tak leh rang takin an kal thei tawh a, damlo na zual tak tak te pawh rang takin Aizawl an thlenpui thei tawhin, nunna hial chan hmanna thin ah pawh chhan theih an ni tawh tih an sawi. Hemi kawng vang hian eizawnna kawng thar tam tak - hotel/thingpui dawr te , motor siamna te, thlai thar zawrh lamah te nasa takin kawng a in hawng tih thu an sawi bawk.

Tunah hian World Bank Kawng hi peihfel tep a ni tawh a, fur hma hian hna zualpui chu zawhfel beisei a ni. World Bank kawng avang hian, Lunglei to Aizawl, km 235 ni thin, darkar 8 vel kal chu tunah chuan km 164 ni tawh in, darkar 5 vel a chauh kal a ni ta a ni.

World Bank Journalist hian he kawnga rawn tlawhna chhan chu, mipuiin an hman tangkai dawn leh dawn loh te leh tul dang awmte report pe turin a ni.