Indian Olympic Association bultumin, state tinah Olympic Day Run vawiin hian hman a ni a. Mizoram khawpui, Aizawl-ah pawh Mizoram Olympic Association buatsaihna hnuaiah, infiamna discipline hrang hrang association member ten tukin zing dar 6 khan Chanmari leh Sikulpuikawn atanga tlanin Lammualah an intawkkhawm a. Inkhawmna hun tawite neihah Pu R.Lalzirliana, Home Minister chuan a hmanpui a ni.
 
 
Pu Zira chuan kal khawmte chu hmasawn zel duhtu an ni tiin, tlan zawng zawngte chu infiamna ngaina mi leh hriselna lampang ngaipawimawh mi an ni tih a tilang a, a lawmawm hle a ni a ti a. Olympic thil tumte sawiin, Home Minister chuan Olympic thupui ‘ rang ber, sang ber leh chak ber nih tum tur ‘ tih nimahse, infiamnaah reng reng lawmman lak tum ngawr ngawr nilovin, zuk tel ve nih kha a hlutna zawk chu a ni a ti. Pu Zira chuan LPS Pro Fight buatsaiha Light Flyweight category a champion Laldinsanga chu 1st MAP ah hna pek anih tur thu a sawi bawk a ni.

Olympic Day Run hi International Olympic Committee din vawi 115 na denchhena buatsaih a ni a. Mizoram Olympic Association (MOA) hi kum 1986 a din a ni a, vawiin hun ang erawhchu a vawi 4 hmanna chauh a ni. Tlan te hi MOA recognized association atangin 17, SAI leh adangte atangin 64 an tel a. A lununga tel zawng zawngte chu 1700 vel an ni. Association hrang hrangte hnenah hian Home Minister chuan lawmman semin, association member tel tam dan a zirin lawmman dawn a in tam hleih a. Member 20 – 49 tel hnenah Rs.1000/-,  50 – 99 ah Rs.3000/- leh 100 chunglamah Rs.5000/- te a pek an ni.

Inkhawm hi Mizoram Olympic Association Secretary General Pu Zoliana Royte in a kaihruai a ni.
 
 

Attachment

  • Loading attachment...