No.405/2020-2021

Home Minister Pu Lalchamliana chuan Covid-19 avanga inkharkhipna neih mek chhunga ramri hrul venghimtute duty-na hmun "Border Outpost" a tlawh kual a. Vawiin khan Phaisen BOP, Vairengte Screening point leh Check Gate te a tlawh.

Phaisen Border Outpost ah hian Phaisen Village Level Task Force te nen inkawm in ramri dep a Mizoram Police leh Task Force duty-te inpekna leh hmalaknaah Home Minister chuan lawmthu a sawi a, ram venhim nana khawtlanga lungrual taka thawhhona awm thin chu mizo nih tinuam tu a ni, a ti. Covid-19 hri len hun chhung tur hriat a nih loh avangin hahdam zawk a duty dan ruahman thiam turin a chah a, duty te mamawh ang mask, glove leh Protective suit a hlan bawk a ni. Pu Neihchungnunga, IPS, DIG (CID) pawhin thu sawiin duty te chu Covid-19 hri laka inven dan hrang hrang hriattur pawimawh te zawm a, fimkhur tak a duty turin a chah a ni.

Home minister hian Vairengte Screening point leh Check gate tlawh lehin, Motor lian, permit nghak a gate bul a tangkhang thahnem tak awm thin chu khawtlang tan him lo a an ngaih thu Vairengte Task Force hruaituten an lo thlen a. Minister chuan hemi chungchang ah hian Home department Secretary be nghalin Vairengte check gate a lirtheite chu rang zawk a gate an paltlang zung zung theih nan ruahmanna siam a nih tur thu a sawi a ni. Police leh Task Force, ramri dep a duty te hman tur invenhimna hmanrua engemaw zat a pe nghal bawk a ni.

Home Minister hi Pu Vanlalfaka Ralte, SP Kolasib, Pu Isaac C Lalrempuia, SDO(C), Vairengte, Neng Thianlala, BDO, Bilkhawthlir leh Vairengtea Police hotuten an tawiawm a ni.