Vawiin khan Home Minister Pu R.Lalzirliana chuan Police Headquarters Building saklai Khatla a mi te, Mualpuia Central Police Workshop leh Tribal Girls Hostel sak mek te, ITI venga Fire Station sak mek leh Rajiv Gandhi Stadium-te a tlawh.

Home Minister Pu R. Lalzirliana chuan Home Department leh NECS ten thawkhova Central Sawrkar atanga hmasawnna sum tam tak haichhuaka hna tha taka thawh a ni chu lawmawm a tih thusawiin Police Headquarters Building chu Aizawl khawpui timawitu tling tura sakchhuah a beisei thu a sawi a ni.

Cheng nuai 1555.79 senna tur Police Headquarters Building hi Ministry of DoNER a Non-Lapsable Central Pool of Resources (NLCPR) suma sak a ni a. He building tharah hian DGP, ADGP, IGP, DIG te, AIG leh AIGP teleh officers dangte leh PHQ Staff te awmin Establishment branch, General branch, Legal branch, Accounts, Consruction branch, Technical cell, Training branch, Computer room, Control room leh Confidential branch staff room te a awm hrang vek bawk. Hei bakah hian Conference Room pakhat leh Multipurpose Hall lian tawk tak a awm bawk a. Canteen, outdoor landscaped area leh terrace garden te dah a ni bawk. A building hi chhawngthum niin Block A leh Block B ah then a ni a, hemi block pahnih hi nalh taka inkalpawhna lei hmanga dawhzawm a ni.

PHQ a tlawh zawh hnu hian Home Minister chuan Mualpuia Central Police Workshop saklai mek a tlawh a. He Workshop sakna tura sum ruahman chu cheng nuai 175.28 a ni. 3rd MAP hmun Mualpuiah NECS chuan June 2015 atang khan a sak hna a thawk tan a. He building-ah hian Ground Floor leh Basement chhawng khat awmin Ground Floor ah hian Workshop 4 dah niin basement ah hian Tailoring, Electrical room leh Store room te dah a ni bawk. Mualpui veka Social Welfare Department hnuaia Tribal Hostel sak lai mek pawh Pu R.Lalzirliana hian a hmunah a fang nghal a. He hostel hi cheng nuai 381.50 senga sak zawh tura ruahman a ni. PHQ, Central Police Workshop leh Tribal Hostel sak hna hi Northeast Consultancy Services (NECS), Aizawl in an thawk a ni. Pu R.Lalzirliana hian ITI venga Fire Station thar tur chu a hmunah a tlawh nghal bawk.

Home Minister hian Rajiv Gandhi Stadium tlawhin he Stadium hi tun season a I-League khelhna tur atan a tulangin AIFF leh FIFA lam hotuten a hmuna an rawn endik hnua an duhdan angin PWD, Aizawl FC leh MFA hotute inrawnkhawmna hnuaiah a design pawh siam that niin tunah hian PWD chuan a sak chhunzawm hna an thawk mek a. Home Minister chuan PWD hotute chu nakum January thlaa I-League an khelh ngei theih nan chak zawka hnathawh chhunzawm turin a hrilh a ni. Stadium sak mekah hian Dressing room pahnih, Shower areas, VIP Lounge area, Media Working rooms, Referee leh officials room te leh Conference room turte chu siam mek a ni. RG Stadium hi AIFF Inspection team chuan 16th November 2015 hian an rawn endik leh dawn a ni.

Home Minister hi DGP Pu Thianghlima Pachuau, IGP Pu Zorammawia, DIG Northern Range Pu L.Hrangchal, AIG-II, Addl.Secy. Home, Jt.Secy. Home leh Home Department Officer dangte bakah PWD E-in-C Pu Vanlaltluanga leh a thawhpui officer-te, Social Welfare Department officer-te leh NECS atangin Pu Robert Romawia Royte leh a hoten an tawiawm a ni.