Vawiin November ni 13 khan Mizoram sawrkar-a Directorate of Science & Technology bultumin Berawtlanga Mizoram Science Centre-ah International Year of Light pualin hun hman a ni.
He hunah hian Planning Department Principal Adviser leh Ex-officio Additional Secretary Pu Ngunlala Chinzah-chu khuallian niin a hmanpui a. Mizoramah Planning Department-a Directorate of Science & Technology-in kawng hrang hranga hma a sawn thu sawiin, Mizoramah hmasawnna tura tan lakna tur tam tak a la awm thu a sawi. Khuallian chuan eng pawimawhzia sawiin, engtik lai maha kang ve ngai lo nieng chakna tun aia tha zawka hman tangkai dan zawn a tulzia a sawi a. Eng siam chhuah chungchangah leh eng hman tangkai chungchangah mithiam ten hma nasa lehzuala an lak a ngai a ni, a ti.
He inkhawm hi Directorate of Science & Technology-a Chief Scientific Officer Dr. R.K. Lallianthanga'n kaihruaiin inlawmna thu a sawi a, United Nations General Assembly vawi 88 na December ni 20, 2013 a neihin Eng(Light) leh Light atanga thil siamchhuahin khawvel mihring te nun a khawih dan leh hmasawnna kawng hrang hrang a thlen dan mipuite inhrilh hriatna hun atan kumin 2015 hi International Year of Light and Light-based Technology-a puan thu a sawi.
Govt. Zirtiri Residential Science College-a Prof. B. Zoliana te, Pachhunga University College-a Asst. Prof. Pu Lalrinthara Pachuau leh Mizoram Science Centre-a Scientific Officer Dr. Aldrin Malsawmtluanga te hnen atangin Light (Eng) nihphung te, a pawimawhna leh mihring te tana hmasawnna a thlen dan chipchiar takin ngaihthlak a ni a. Directorate of Science & Technology a Senior Scientific Officer Er. H. Lalsawmliana'n lawmthu sawina hun hmangin inkhawm tihtawp a ni a. Tlaiah zanriah kilho nghal a ni.
He hunah hian Directorate of Science and Technology-a thawkte bakah sawrkara technical department hrang hrang - PWD, PHED, P & E te, Mizoram University, Pachhunga University College, Govt. Zirtiri Residential Science College, RIPANS, IASE, DIET, NEILIT, NIT, Women Polytechnic, Higher Secondary-a Science zirna in te, Science tlawmngai pawl Mizoram Science Society, Science Teachers' Association Mizoram (STAM), Mizo Academy of Sciences, Mizoram Mathematics Society atanga sawmbikte an tel.
