Nimin tlai khan Home Minister Pu R. Lalzirliana chuan Pu Thantluanga Hauva’n  TT Industry hmingpu a plastic tuizem siamna factory Sethawn a a din chu a hawng.   He hunah hian Home Minister hi Forests & Environment Minister Pu Lalrinmawia Ralte; Parliamentary Secretary Pu H. Zothangliana leh Parliamentary Secretary Pu Hmingdailova Khiangte Tuirial bialtu ten an tawiawm a ni.

Pu R. Lalzirliana chuan Mizoramin industry dinna lamah ke kan pen tan hi a tha a, mahse tun hma lama industry lo din tawh te hi hlawhlting fumfe an awm vak lo a ni, a ti a. Hun kal tawh ah miten Sawrkar atanga tanpuina dawn beisei ringawtin Industry an din a, chung mite chuan Sawrkar Laipui tanpuina ang chi Central Transport Subsidy te an dawng a, mahse hmalakna tak tak an nei lova, sum an khawhral mai mai a, hetiang mite hi Mizoram tan hmelma an ni a, mi huat bak an hlawh lo a ni, a ti a. Anni avang hian thalai leh tih tak zetna nen industry din duh te tan hun lokal lehzel turah kawng an hnawhping ang tih a hlauhawm a. Heng thilah te hian mimal an demawm rualin, an mahni puitu Sawrkar hnathawkte an dem awm zawk em tih ngaihtuah chian a tha a ni, a ti bawk.

A sawizel naah Mizorama Industry hlawhtlin theih lohna pakhat nia a hriat chu mi hnuaia thawk leh Industry neitu tena an chhawr te hi an rinawm loh fo thin vang nia a hriat thusawiin, a neitu te eiral tumna leh thil tih mai mai kan chin ang te hi kan kal pel a hun tawh a, mi rinawm leh taima chu miten engtik lai pawhin an chhawr duh reng a ni, a ti.

Home Minister chuan police ten misual an kawl lai leh dan anga rorel sak tura an buaipui laiin mi thenkhat infuihpawrh thin te an in hrosa a, police kuta awm tawh an hmel en chak ringawt te hi huaisenna diklo a ni a. Huaisenna dik zawk chu tanpui ngaite leh mi mangang te tanpui a ni a, misual man sa chunga thinrimna lantir kawngah a innghat lo a ni, a ti. 

Pu Hmingdailova Khiangte chuan Turial bial chhungah hetiang Industry Mizoramin tangkai taka kan chhawr thei tur din a ni chu lawmawm tiin hawlhtling taka kal zel turin duhsakna a hlan.

TT Industry hi Pu Thantluanga Hauva din a ni a, he industry ah hian plastic tuizem litres 200 atanga litre 2000 thleng an siam a, an rate hi state pawm lam aiin a tlawm zawk a. Hetianga man tlawma an tih theihna chhan chu Mizoram Industrial Policy vang liau liau anih thu a neitupa hian a sawi. Tuizem siamna atana hmanrua chu India company lar leh belhchian dawl Reliance Company, Jamnagar siamchhuah an hmang a ni.