Vawiina Swachh Bharat Mission Sub Group meeting vawi 3-na Bengaluru a neihah Chief Minister Pu Lal Thanhawla chuan he faina beihpui hlawhtlinna tura thil tul a tihte a thlen. Meeting hi Andhra Pradesh Chief Minister Pu Chandra Babu Naidu kaihruaina hnuaia neih a ni.

Chief Minister Pu Lal Thanhawla chuan faina campaign hlawhtling tur chuan mipuite zau zawka hriattir a, an mahni tel ve ngeina tura kalpui a tul a ni a ti a. Senso tur sum pawh centre sorkarin hnianghnar taka pein, faina changchangah primary school level atanga zirlai naupangte zirtir a, hei hian faina campaign hlawhtlinna tur thui tak a hril thei a ni a ti.

Chief Minister chuan campaign beihpui programme thlak ringawt a tawklo tiin, rei tak daih tura kalpui angai a ni a ti a.A tlangpui thuin faina leh thianghlimna kawngah mipui te rilru sukthlek tih danglam tul a tihthu a sawi a. Hei hi thil awlailo nimahse, Information, Education and Communication (IEC) kaltlangin mipuite inpawh taka an awm theihna tur kawng dap a tul a ni a ti. State rethei, hmarchhak state te ten an mahnia fund an neilo  tih sawilangin, Pu Hawla chuan central sorkar atanga tanpuina fund pek dante hi 90:10 nise a ti a. Hengte bakah hian private sector leh central Public Sector Undertakings (PSUs) ten mission hi zau zawkin kalpui se tiin, an ‘corporate social responsibility’ (CSR) atangin alo berah 50% tal hmang se a ti a ni.

Chief Minister chuan ram puma Mission kalpuina tur Rs. 2.24 lakhs Crore dah hi a tha thawkhat hle tiin, ngaihdan a neihte a sawi a. Khawvela tuialhthei man tlahniam zelah sum khawl pung awm ta hi 50% tal Swachh Bharat Mission tan dah nise ; corporate house ten an ‘csr’ atangin 50% tal dah bawk se, PSU ten hna thawk tak tak bawk se tihte Chief Minister hian a thlen a ni. Hengte bakah Sixth Schedule Area hnuaia local bodies te tana 14th Finance Commissionin sum a dahlo chu central sorkari sum dah ngei turin Sub Group hian rawtna siam se a ti bawk a ni.

Chief Minister hian nimin khan Bengalurua Mizoram House sakna tur hmun Karnataka sorkar-in Mizoram sorkar hnena a pek pawh a hmunah a en a, Karnataka sorkar official leh Mizoram House a thawk ten Chief Minister hi an tawiawm a ni.

Vawiin Swachh Bharat Mission Sub Group meeting ah hian Chief Minister hi Pu T.P.Khaund, Principal Adviser to Govt of Mizoramin a tawiawm a ni.