Vawiin khan Home Minister Pu R.Lalzirliana chuan a pisaah 28.3.2015 a HPC(D) ten Zokhawthiang khaw daia MLA pathum an lambun tum a thi ta SI Zoramthara Khawlhring leh D/G III C.Lalchuailova chhungte hnenah ex-gratia lumpsum compensation cheng nuai 10 ve ve a hlan. Chhungkaw lama harsatna an neih avangin C/673 Hmangaihmawia chhungte hnenah erawh tun tum hian hlan theih a ni lova, an remchan veleha hlan turin sawrkar chu a inpeih reng a ni.
Home Minister Pu R Lalzirliana chuan MLA zin veng tura kal police-te'n an duty hlen chhuaka nunna hial an chan phah hi Mizoramin a theihnghilh ngai tawh dawn lo a ni, a ti. Martar nu leh pa leh an chhungte a tawrhpui thu sawiin Mizoram sawrkar hotulute atangin Police Department ten an thlavang an hauh nasa hle a ni, a ti a. Pawikhawihtute hi umzui nghalin he thila inhnamhnawih mi paruk jail-ah an khung tawh a, mi pakhat kahhlum niin pakhat dang a thi tawh bawk a, hel te hnena MLA te zin chungchang information lo pe rutute pawh man an ni, a ti. Home Minister chuan tha thlah miah lovin heng hel pawlte hi police-ten an umzui zel tiin State pawnah an bihruk avangin India ram danin a phuar a, duh anga ranga zawn hmuh theih ni lo mahse inlambunna a tel helpawl te an man kim hma chu tha an thlah dawn lo, a ti bawk. Helpawlten inbiak an duh thu sawi mahse Home Minister chuan Constable pakhatin a tlanbopui silai pahnih leh a mu zawng zawng bakah MLA an ambush tuma an silai lak leh a mu zawng zawng an pek kir hma loh chuan inbiakna lam hawiin sawrkarin ke a pen dawnlo reng reng tih chu sawrkar dinna nghet tak a ni, a ti.
Parliamentary Secretary Lt.Col (Rtd) ZS Zuala pawhin nunna pe a an duty hlenchhuaktu police te a ui thu leh an chhungte a tawrhpui takzet thu sawiin sawrkarin an tana a tih theih sang ber a ti a, a ti zel dawn bawk a ni, a ti. Helpawl beih let kawngah police ten tha an thlah dawn lo a, vawiin ni thlenga police te hmalakna chuan rah tha a chhuah zel tih a lang a ni, a ti bawk.
Sawrkar chuan an duty hlen chhuaka nunna chante, ram tana an inpekna a ngaisang a, a chhuang tak meuh a. An kalsan tak an chhungte tan theih anga hma la zui zelin Home Department chuan sawrkara ex-gratia grant awm thei ang te a ngaihven sak a. July 27, 2015 khan Finance Department chuan OM No. G.17011/4/2011-F.APF dated 27.10.2010-a Clause 1(b) behchhanin heng police thi ta pathum chhungte hnena hlan tur cheng nuai 10 theuh pek a phalsak a. DM&R a bawhzui ngaite bawhzui a nih hnuah tun thla tir khan cheque lakchhuah a ni ta a ni. Police thi ta chhungte zinga pakhat theuh Home Department-ah hna nghet pek an nih bakah heng police thi ta chhungte hian an hlawh lak hnuhnung ber ang zat kha thla tin, sawrkar atanga an pesion ni tur thleng hlawh an la thei dawn a ni.
SI Zoramthara Khawlhring pa Pu K.Hrangnawna leh D/G III C.Lalchuailova pa C.Thanzama'n Home Minister Pu R.Lalzirliana hnen atangin cheng nuai 10 cheque hi an dawng a ni.
