Vawiin khan Home Minister Pu R.Lalzirliana chuan Arya Mess, Police Headquarters-ah Police hnathawk thate chawimawina hun a hmanpui. Kumin Independence Day 2011-a hnathawh that avanga chawimawina dawng tur Police 4 te hnenah Home Minister hian Medal a hlan a. Kumin June thlaa ABCI hnathawktu mi 2 rukbo chhanchhuaktu police 21 te chu Pu R. Lalzirliana hian Home Minister’s Discretionary Fund atangin lawmman tangkafai a hlan bawk a ni.

Khuallian chuan vawiina Mizoram police chhuanawm tak tak mi 25 lai chawimawina hun hman a ni thei chu a lawmawmin a ropui hle a ni, a ti. Mizoram police te chu hmun dang police te aiin an duai bik lova, pawikhawihna lian thamah pawh rang taka misualte manin case chinfel vat theih thin a ni a, mipui pawhin an thlamuanpui hle a ni, a ti. ABCI hnathawktu rukbo ni kha ni lungaihthlak a ni a, an  chhanchhuah ni kha ni lawmawm tak a ni ve thung a, a inkar hun reilote ah Mizoram Police te remhriatna, huasenna leh tumruhnain heng mi rukbo mi 2 te hi him taka rawn hawpui thei chauh a ni a. Mumbai-a misual hmingthang leh police te pawhin rei taka an veh tawh an man theih si loh, Mizo hmeichhia 4 te hralhtu pawh Mizoram Police hmalakna chak tak avangin man a ni a. Heng kan police te chetthatna hi khawvelin min hmuhpui a, kan hmingthatpuiin kan chhuang tak zet a ni, a ti bawk. Khawvel hmasawnnain sualna chi hrang hrang a rawn luhpui te do let zel turin kan police te chu training tha pek zel an ni a, mipuite venhimna leh dan leh thupek kenkawhna kawngah Mizoram Police te chu rintlak  ni zel turin duhsakna a hlan bawk.

Mizoram DGP Pu Lalrokhuma Pachuau, IPS pawhin thu sawiin Police ten hna tha engemaw an thawhchhuah te avanga kan chawimawi thiam hian an inpekna a zual thin a ni, a ti. Home Minister-in a finchhuahna zara he hun hmang thei leh Home Minister Discretionary Fund phal taka police te lawmman atan a hman tir avangin lawmthu a sawi a. State dangte ang bawkin Mizoramah pawh tualthahna, pawngsual leh rukruk te hluar mahse kan police te chuan case tam zawka pawikhawihtute an man chhuak thin hi an fakawm hle a ni, a ti. Tunlai motor leh bike bo thin chungchangah mipuite pawh tun aia fimkhur tur leh  garage ngeia hung a, kalh theih nise duhthusam a ni tih a sawilang bawk. Sorkar-in Police te hmasawnna ngaihtuahin tunhnai khan Commando Company 2 a din leh police thuamthatna tur Bullet-proof troop carrier 2 leh raltuam engemawzat a ngaihtuah sak mek chungah lawmthu a sawi a. Forensic Laboratory changtlung tak din tawh a nih thu te, SP Security office building, 2nd Bn. Commandant office building, Lunglei leh Serchhip SP office te pawh peih hnaih anih tawh thu a tarlang bawk. Sorkar Laipuiin Home Minsitry hnuaia rampum Police te tana Project lian ber  a duan ‘Crime Criminal Tracking Network System (CCTNS)’ pawh a thawh khatna chu Mizoram Police te pawhin an training zo fel tawh a, Police te tuaitharna Seminar leh training buatsaih reng a nih thu DGP hian a tarlang bawk a ni.

Vawiina Home Minister Discretionary Fund atanga chawimawina dawng te chu:
1. Addl SP H.L.Thangzuala, CID (SB)               2. Insp. Laltanpui Sailo, CID (SB)
3. Insp. Malsawma Royte, CID (SB)                4. SI. John Daniel Rengsi, CID (SB)
5. SI. JH. Chunglianthanga, CID (SB)                6. SI. V.L. Zawmliana, CID (SB)
7. H.C. Zosangliana, CID (SB)                    8. H.C. B. Laltanpuia, Mamit DEF
9. Hav. Zoremmawia, 1st IR Bn.                10. Nk. Hrangzuala, 1st IR Bn.
11. Const. Lalngaihawma, CID (SB)                12. C/40 Lalramthanga, 1st IR Bn
13. C/178 Lalbiakkunga, 1st IR Bn.                14. C/217 Vanlalliana, !st IR Bn.
15. C/259 Vanlalpeka, 1st IR Bn                    16.C/319 Krosthianghlima, 1st IR Bn
17. C/346 Zoramthanga, 1st IR Bn                18. C/382 Vanlaldika, 1st IR Bn
19. C/514 Lalrammuana, 1st IR Bn                20. C/944 Lalrobuanga, 1st IR Bn
21. C/673 Lalmuanpuia, 1st IR Bn

Heng bakah hian Police hnathawk tha te hnenah a hnuaia mi ang hian hnathawh that lawmman hlan an ni bawk.

1. President’s Police Medal for Distinguished Service- L Hrangnawna, IPS, IGP Mizoram - Independence Day, 2010

2. Police Medal for Meritorious Service- Pu Lalhmingliana Sailo, Asst. Comdt, 3rd IR Bn- Independence Day 2009; Pu R.S Liantluanga, Inspr. CID (Crime)- Independence Day, 2010; Pu Lalzuithanga, Const. Aizawl DEF, Independence Day, 2010