Northeast Frontier Railways(Construction)hotute chuan tukin zing khan Chief Secretary Pu Vanhela Pachuau chu a bungalow-ah hmuin Sairang thlenga rel kawng siamna tur ruahmanna chu chak taka thawh thuai a nih theih nan Mizoram sorkara an mamawhte an thlen.

Mizorama rel kawngpui(Broad gauge) Sairang thleng siam hna hi kum 2015 March thla a thawh zawh hman beisei a ni a. Rel kawng atan hian Aizawl leh Kolasib district chhungah mimal leh sorkar ram 427 hectare vel lak a ngaih dawn avangin N.Frontier Railways hotute chuan land acquisition tihfel thuai a tul thu leh a hun taka zo hman tura hna tan thuai an duh tawh thu Chief Secretary hnenah an thlen a. Chak taka ruahmanna bawhzui turin Aizawl a camp office an mamawh te, rel kawng siam tura feeder road an mamawh te, anmahni puibawm tur, Mizo officer leh hnathawktu dang deputation a thawk tur an mamawh te pawh Chief Secretary hi an sawipui bawk a ni.

Chief Secretary chuan  rel kawngpui lianin Sairang a thlen hunah chuan ei leh bar lakluh kawnga Mizoram in harsatna tam tak a tawh thin chu a tinep thei dawn tih sawiin Mizoram sorkar chuan a tulna apiangah tan lak a inhuam tih a sawi a. Land acquisition chu buaipui mek a nih thu leh hemi chungchangah hian  harsatna lian a awm a rin loh thu a sawi a. N.Frontier Railwys hotuten mamawh dang an neihte pawh Mizoram sorkar hnenah kimchang taka ziaka thlen turin a lo hrilh a ni.

Bairabi leh Sairang inkara rel kawng siam tur hi 51Km vela thui niin a karah station 4 dah tur a ni a. Hmun 24 laiah leiverh kaltlang tur leh lei 208 dawh tur a ni a. N.Frontier Railways hotute chuan Mizorama rel kawngpui siam chu an tan chona phurawm tak a ni tih sawiin ram leilung enfiah turin geo-technical investigation neih thuai an tum a ni.

N.Frontier Railways hotute hi Pi Vijaya Kanth, General Manager(Construction) hovin an lo kal a. Mizoram sorkar lam atangin Pu R.L.Rinawma, Commissioner, LR&S, Pu S.S.Garbyal, Secretary, Environment & Forest, Pu H.Darzika, Secretary & Director Transport leh Pu Shurbir Singh, D.C.Aizawl te an tel bawk a ni.