Vawiin chawhma dar 11.00 khan Mizoram-a Centrally Sponsored Scheme hnuaia Hindi zirtirtute chuan an pawl khawmpui vawi khatna Vanapa Hall-ah an hmang a; Education Minister Pu Lalsawta chuan a hmanpui.

Pu Lalsawta chuan, “CSS hnuaia Hindi Teacher thawk mek mi 1305 te hi he scheme-in a huam hun chhung 2016-2017 thlenga thawk tura lak in ni a; hemi hnu lama in awm zel dan tur chu sawrkarin a la ngaihtuah chhunzawm ngei turah dah ila. Mizoram hian Hindi zirna leh thiamna hi a mamawh em avangin sawrkar chuan in dinhmun tur hi a ngaihthah ngai loving” a ti. High school-a Hindi zirtirtute chu an zirlaite middle school-a Class VIII dah a nih tak avanga inthlahdah lo tura chahin, “Tunah hian kan mithiamten Class IX leh Class X zirlai tur an buatsaih mek a, kum tharah chuan high school-ah pawh Hindi zirna hi mumal taka kalpui tum a ni a; zirtirtute inbuatsaihna tur Hindi zirtir dan kaihhruaina lehkhabu pawh peihfel a ni tawh a ni” Pu Lalsawta chuan a ti. Hindi zirna chu nitin nuna hman theih tur ang zawnga kalpui a tul thu sawiin, “Zirlaibu har pui pui nena inzirtir ai chuan nitin khawsaka kan hman tangkai theih tur ang zawnga inzirtir hi a tul hle a; middle school atanga Class X inkarah hian naupangte zingah Hindi tawnga chemkal zualte leh zir bing awm mite chu kan thliarhrang thei tawh tur a ni. Hindi te, mathematics leh science subject-te hi zirlaite tana zir huphurhawm ni lova zir chakawma siam kan tum a ni” Pu Lalsawta chuan a ti bawk. CSS hnuaia Hindi Teacher-ten hlawh an lak theih lawk loh chhan chu Central atanga pawisa a lo thlen loh vang a nih thu hrilhin, an harsatnate sukiang tura sawrkarin theih tawp a chhuah thu Minister chuan palaite a hrilh a ni.

Vawiina CSS Hindi Teachers Association hi 18.2.2011-a lak tharte an ni a, an zavaiin mi 1305 an ni. Conference hi an pawl vice-president Joseph RVL Muanpuia chuan a kaihruai a; chawhnu lamah rorel thutkhawm an nei a, an pawl dan-bu siamthat leh pawl thil pawimawh dangte an rel a ni. Education Minister hi Pu F. Lalhluna, Jt. Director leh officer dangten an tawiawm a ni.