Mizoram chhunga rel kawng sial hna enpui tura din State Level Task Force te chu a vawi 9-na atan vawiin khan an Chairman Pu Zasanga kaihhruaiin I & PR Conference Hall ah an thukhawm a. Chak zawka hna kalpui a nih theihna tur ngaihtuahin an hmalakna hrang hrang leh hmachhawp an sawi ho a ni.

Vawiin thutkhawmah hian NF Railway Chief Engineer hnen atangin an hmalak chin ngaihthlak a ni a. Sairang thlenga rel kawng sialna tur survey tih zawh tawh anih thu te leh sum mamawh zat tur cheng vaibelchhia 2384.34 Railway Board hnena July 2010 a thehluh chu tunah hian sanction theih mai dinhmuna a din tawh thu te; SLTF meeting hmasa a rel tawh angin Railway, DC Aizawl leh Kolasib, Revenue leh Forest Department te nen a huho a enthlithlai, Joint Verification neih a nih hnuah Rel kawng siam nana mamawh tur ram chu Forest ram 74.488 hectares leh mimal/ Revenue ram 352.792 hectares, a pumpuiin 427.28 hectares anih thu te tarlan a ni a. NF Railway CE chuan Forest Clearance lak chungchang leh rel kawngin mimal ram a khawih tur enchian chungchang chu an mutan ber a nih thu tarlangin Meeting chuan a rang lama bawhzui nghal nise tiin a rel a. NF Railway CE chuan rel kawng siam hna zawhfel an inbeisei hun (target) chu 2015, March thla a nih thu tarlangin Tender pawh chhuah thei tura tih tul zawng zawng tihfel thuai an inbeisei thu an tarlang a ni.

Vawiin meetingah hian MLA pahnih Pu Hmingdailova Khiangte leh Pu C. Ramhluna te bakah Transport Secretary Pu H. Darzika, DIG (Hqrs.) Pu Saizela leh Department hrang hrang atangin officer-te an tel a ni.