Vawiin chawhma dar 11 : 00 khan DC Office Chamber, Saiha-ah District Bawrhsap in ruahmanna a lo siam tawh angin “District Education Committee” chu District Bawhsap Pu Kunal IAS hova neih a ni.

He Meeting-ah hi an District chhung-a SSA kalpui dan leh hmalakna hrang hrangte thlirhona neih a ni a, hmalak mek leh hmachhawp te pawh thlir ho niin hmasawnna neih dan tur kawng hrang hrangte pawh huamzau taka sawi ho a ni.

Meeting ah hian S.SA. Saiha District Project Co-ordinator Pu J.B.Chozah chuan report pe in, kum 2004-2006 inkar-ah “Computer Aided Learning Scheme” kalpui nan ACES Info. Tech. atangin Computer 100 dawn anih thu a sawi a, chung Computer te chu Computer Centre 10 ah 10 theuh va dan anih thu a sawi bawk. Heng Computer Centre 10 atang hian panga (5) theuh lak chhuah a Computer Centre dang 10 hawn belh tura ruahmanna siam a nih thu a sawi bawk.  Tun dinhmunah Computer 25 chauh lakkhawm tur an hmuh thu member kalkhawmte a hrilh a ni. Heng Computer Centre te enkawlna pawh ACES Info Tech. ten an tum tur anih laiin a maintanance a that tawk loh avangin Computer tam zawk te chu hmantlak lova a awm tawh thu a sawilang bawk. Tunhnai-ah JIL Company atangin School 20 a dah tur Computer 20 an dawn thu pawh sawilang in, Kum 2011-2012 atan UPS Teacher 137 tan thlahnih hlawh chauh an la hmuh thute a tarlang bawk. District Bawrhsap Pu Kunal IAS chuan VEC lumber ah hian Tlawmngaipawlte a tam thei ang bera an awm a pawimawh thu sawiin hetianga tlawmngai pawl te kan hman tangkai thiam phawt chuan Civil Works leh Midday Meal ah pawh tun ai hian kan dinhmun a tha zawk ngei ang a ti bawk.