Chief Minister Pu, Lal Thanhawla chuan zirlaite leh Mizo thalai te chu kan hnam tlu chhe mek tungding leh tura kan in nghahna ani ati a. He thu hi Chief Minister chuan nimin chawhnu dar 2:00 a Lunglei Government College Girls Hostel No. 1  hawnna ah zirlai leh zirtirtu te hma ah sawiin zirlaite tan Education tha tak pek chu sawrkar ngaih pawimawh ber te zing ami ani a ti. Hostel hawnna inkhawm, Lunglei Govt. College Principal Pu C.Hrangdula kaihruai ah hian Chief Minister  chu Khuallian  niin a nupui Pi Lal Riliani, LAD Minister Pu P. C. Lalthanliana, HPC Vice Chairman Pu Joseph Lalhimpuia, Parliamentary Secretary Pu H.Zothangliana leh Lunglei DC Pu V.Sapchhunga, IAS ten an tawiawm a ni.

Chief Minister chuan Education background tha tak neih hmasak phawt chu kawng engkima pawimawh hmasa anih bakah ram hruaitu ni tur phei chuan a pawimawh hle a ni a ti. Mizoram in a mamawh em em chu duhamna leh hlemhlet na la kailo thalaiten neitu nihna leh siamthatu nih duhna thinlung an put hi a ni a ti. Thalaite tana kawngdik hmasa chu aia upa, nu leh pa, zirtirtu te thu tha  taka zawm leh Education background tha tak neih hmasak a nih thu a sawi. Nu leh Pa leh aia Upa te chawimawi hi mahni in chawimawina tha ber a ni a ti. Thalai mutna chang hrelo leh thawhna chang hrelo kan pun zel chuan kan ram hmabak a thim a - Census hnuhnung ber a Mizoram a mikhual nuai 2 chuang hian min ti rethei hle dawn a ni a ti. Education Standard ti sang tur hian sawrkar in tha leh sum tam tak a sen belh zel a, Mizoram Education Reform Commission in a reccommend te tihlawhtling turin a tlem berah vaibelchhe 700 tal mamawh anih thu leh he rawtna puitlin nan Planning Commission, Finance Commission leh DoNER te dawr mek zel a nih thu a sawi. Chief Minister chuan hmelma tam tak lakah Mizoram chu ven a ngai nasa hle a ni a ti. Mahni hnathawh leh eizawnna a tuilo hi 50% aia tam mah kan awm a, Ram leh hnam-ro tur ti riral mai duh Contractor hnathawk chhe em em mai an tam ta lutuk te pawh hi kan ven ho a tul a ni a ti. Mi duham leh midangte hmangaihna neilote insak leh lirtheite chuan Aizawl khawpui pawh a nek chep vek tawh a - sum ngainatna leh kuttlinglova sum duhna ten kan hnam a chim pil mek a a pawi hle a ni a ti. Kan harsatna leh buaina  atanga min chhan chhuak tur hian thangthar rilru thianghlim leh huaisente Mizoram in a au a ni a ti. Mizoram chu chhan tlak la awm a, chhan turin zirlai leh thalai ten kawng dik an zawh a pawimawh hle thu a sawi. Thalai te hmachhawp a pawimawh hmasa chu zirna leh hriselna tha a ni a, Hrisel loh chuan taihmak pawhin awmzia a neilo a ni a ti. Drug, Zu, Zuk leh hmuam laka in thiar fihlim in, ram hmangaihna thinlung nena zirna tha taka bei turin zirlaite a chah a, a chhe lai siamthatu ni turin Zoram thalaite an rawn din chhuah a tul a ni a ti.

Inkhawm  hi Laltholeha lehkhabu ziah \'The Joy Of Service\' tih chu CM in a release a. Pu Lalzidinga SDO, PWD in Technical report pein Rev. Dr. CL. Hminga, Lunglei College Principal hmasaber in thu a sawi bawk.