Prison Ministry India, Mizoram chuan kum 10 an tlin lawm nan vawiin khan Prison Break Ministry nen tangkawpin Central Jail, Tanhril-ah ‘Homecoming Concert’ an buatsaih a, he hun hi Home Minister Pu R.Lalzirliana’n a hmanpui. Home Minister hi PMI-Mizoram Chairman Most Rev Bishop Stephen Rotluanga, IG Prisons Pi Zoramthangi hauhnar, DIG Prisons Pu K.Lawmthanga bakah officials leh Ministry members engemawzatin an tawiawm a ni.

Home Minister Pu R.Lalzirliana chuan anmahni hringtu nu leh pa te rilru ti na a, timualpho a thilsual an tih vanga jail tangte chu inngaihtuahna hun an neih chhungin nundan dika nung tawh turin a chah a. Jail tang tlanchhuak awm leh thin chu pawi a tih thu sawiin Mizoram zimteah jail tlanchhuakte chu man leh vat an nih thin bakah an tan hun kum telin belh leh thin a nih avangin a hlawk lo a ni, a ti. Sorkar chuan jail tangte hamthatna tur leh an tan chhung hun an hmang tangkai thei turin ‘skill development’ lam pawh a ngaihtuah chho mek zel a. Hmeichhe tangte dahna tur bik Women’s Jail pawh cheng vaibelchhe 14 sengin sak a nih tur thu leh Saitual-ah Jail thar tha tak sak mek thu a sawi a. Vawiin PMI Day pualin jail tang zawng zawngte tan ni 5 remission an neih theih nan IG Prisons hnenah ngaihtuahsak turin a hrilh tur thu a sawi bawk.

PMI-Mizoram Chairman Most Rev Bishop Stephen Rotluanga pawhin thu sawiin Pathian kaihhruaina zarah kum 10 chhung rawngbawlna tluang taka an nei thei chu lawmawm hle a, jail an tlawh apianga lawm leh phur taka anmahni lo dawngsawng thintu jail thawkte leh tangte chungah lawmthu a sawi. Kumin hi Roman Catholic Kohhran hotulu ber Pope Francis-in ‘Zahngaihna Kum’ ah a puan angin Pathianin simna tak tak nena Amah pantute a nghak reng a, jail tangte pawh an awm kumhlunna hmun tur a nih loh avangin he thununna hun hi mahni nun siamthat nan hmang turin a chah.

Prison Ministry India hi mi tlawmngaiten kum 1986 khan an din a, PMI Branch 850 hnuaia volunteers 6000 chuangte chuan India rampum huapin Tan In 1397-ah rawngbawlna an kalpui mek a. PMI-Mizoram Unit hi ni 26.8.2006 khan Bishop Most Rev Stephen Rotluanga’n Central Jail, Tanhril-ah a hawng a. Tunah hian member/volunteer 70 vel Mizoram pumah a nei mek a, Aizawl chhung mai bakah Lunglei, Champhai, Kolasib leh Saiha-ah te Cell Unit a nei mek a ni. Jail tang chhuak hawna tur neilo leh miharsa, tanpui ngaite tan Rehabilitation Centre a enkawl bawk a, chungte chu - 1).Peace Home, Durtlang; 2).Bethany Health centre, Sihphir leh 3).Horeb Retreat Centre te a ni.