Vawiin chhun khan Parliamentary Secretary Pu Joseph Lalhimpuia chuan Ramthar Community Hall-ah Integrated Skill Development Scheme hnuaia Ramthar Handloom Cluster atanga Puantah zirchhuak mi 89-te hnenah North Eastern Regional Textiles Production Scheme atangin Puantahna In sakna tur cheng 26000 theuh a sem.

Pu Joseph Lalhimpuia chuan 11th Five Year Plan hnuaiah Ramthar Handloom Cluster chu a tirah telh nilo mahse, sawrkar thahnemngaihna avanga telh a nih thu a sawi a. Handloom Fair neih nikhua a Lunglei District atanga tel an tlem thin chuan rualawh a ti na hle a ti a, puantah zirchhuakte chu mahni eizawnna a ni tih hria in, taima leh uluk taka thawk theuh turin a chah a ni.

Parliamentary Secretary chuan Mizoram sawrkarin South East Asia ram hrang hrang ah Mizo puan hralh turin hma lak a nih mek thu a sawi a. Lungleia Weaving Centre chu sak chhunzawm nan NEDP atangin nuai 150 dah a ni, a ti. A huhova puantahna hmun Common Facilities Centre din a nih tur thu a sawi a, Sazaikawna Khuai khawina pawh tharthawh leh mek a ni, a ti. Zirna chungchang sawiin, zirlai harsa ten zirna tha an neih theih nan Model School siam a ni a ti a, Lungleiah a hmasa ber atan Electric Venga Middle School chu Model School atan thlan a nih tawh thu a sawi bawk.

Pu Lalhrilliana, Functional Manager pawhin Technical Report pe in Ministry of Textiles-in a bik taka North East mite tana puantah zirna tur North Eastern Regional Textiles Production Scheme hnuaiah hian Mizoramah Handloom Cluster 17 awm in, heng zinga 6-te chu District Council ten an chang a. NERTPS hnuaiah cheng vbch 16.44 sanction niin, ISDS atan cheng vbch 1.12 sanction a ni, a ti a. Heng zir chhuakte hi Puantahna In sakna tur cheng 26000 theuh pek an ni a, an tih that dan azirin puantahna khawl leh Loom pek an ni ang a, Puantahna In zau zawng hi feet 12 bial, a chung hul tha tak leh a bang nei a ni ngei tur a ni, a ti bawk.

Puantah Training kharna Inkhawm hi Pu J. Hmingthanmawia Commerce & Industry Director in a kaihruai a, Handloom & Handicraft Joint Director Pu C. Lalchhandama leh Ramthar Veng VCP Pu H. Lalramliana te pawhin thu an sawi a ni.