2751/2026-2027

Dated Serchhip, the 21^st October, 2026: Vawiin khan Home Minister Pu K. Sapdanga chuan Police Training School (PTS), Thenzawl-a Cadre Promotional Training nei mek - JUO, SUO leh PCC Cadre mi 273 te leh Excise & Narcotics Department atanga Basic Course training mek mi 39 te tlawhin an dinhmun a enfiah.

Minister chuan Mizoram Police-ah harh tharna a thlen mek thu sawiin, tun hnaia Constable 259 te pawh merit based-a, dan dik taka lak an nih thu leh, an discipline a that thu a sawi a. Cadre Promotional Training mekte pawh probationer te hotu tur an nih tawh avangin rilru thar pu a, Mizoram Police hmel thar dintu ni zel turin a fuih a. Constable 350 leh Home Guard Volunteers 94 lak thar leh turah pawh dik taka merit based-a lak leh a nih tur thu a sawi bawk.

Pu K. Sapdanga chuan kum 5 kal ta chhunga kum tin Police 100 chuangte an boral thin nachhan tam ber chu, zu leh ruihhlo kaihhnawih a ni tih sawiin, trainees-te chu ruihhlo laka fihlim zel turin a fuih a, harsatna neite chu hotute pan hreh lo turin a chah bawk.

Mizoram Police danglam bikna chu 'Mizo Tlawmngaihna' a ni tih sawiin, mipuiin Police hmel an hmuha, an thlamuan  phah theihna turin, hlim hmel pu chunga dante keng kawh tur leh Police Station rawn pan mi mangangte pawh lo tanpui var thin turin a chah bawk.

Vawiin hun hmanna hi PTS Principal Pu Lalthakima’n a kaihhruai a, Pi Megna Yadav, IPS, IGP (Training), Pu J. Lalthafamkima, AIG (Training), Aizawl leh Serchhip District MJA aiawhte leh Thenzawl khawtlang hruaitute an tel a ni.

Police Training School Thenzawl-a In-service Training neih mekah hian JUO (Junior Under Officer)  97, SUO (Senior Under Officer)  89, PCC (Platoon Commander Course)  87 an awm a, anni hi kar 12 training tur an ni a, September ni 1-ah tannin, November ni 20-a zo tur an ni. Anni bakah hian Excise & Narcotics department atangin Constable, driver, SI leh Inspector basic training mek 39 an awm bawk a. Anni hi thla 6 course niin, Kum 2027 February thla laihawlah an zo dawn a ni.