4826/2025-2026

Lawngtlai, 13th March 2026 : Vawiin khan Home Minister Pu K. Sapdanga chuan Khuallian niin Residential School, Lawngtlai, Sadbhav Mandal Chawnhu, Girls' Hostel, Lawngtlai leh Chawngte te chu a rualin Residential School,College Veng, Lawngtlaiah a hawng a. Dr. Lorrain Lalpekliana Chinzah Adviser to Chief Minister leh Lawngtlai East bialtu MLA nibawk, leh Pu C. Ngunlianchunga, Lawngtlai West bialtu MLA te chuan khualzahawm nia hmanpuiin, Pu Donny Lalruatsanga, Lawngtlai Bawrhsap chuan hun a kaihruai.

Pu K. Sapdanga chuan Lawngtlai District mipuite leh a mamawhtuten tangkai leh hlawk taka an hman tura Residential School, Lawngtlai, Sadbhav Mandal Chawnhu leh Girls' Hostel, Lawngtlai leh Chawngte te chu a hawn thu a sawi a. Hmasawnna ruhrel tha tak tak hawnte tangkai tak hmang turin Lawngtlai mipuite a çhah a. Mizoram Sawrkarin LLADC kutah phal taka a pek thu tarlangin, a enkawl kawngah thahnem ngai taka thawk turin a chah a ni. Residential School chuan infiammite tan chona thar a pek ngei a beisei tih sawiin, eizawnna tlaka hman a nih a beisei thu a tarlang a ni.

Khuallian chuan thalaiten tih takzet leh rualelna nei chunga ke an pen a hun tawh hle tih a sawi a. Mizoram tihmingthatu ni turin thalaite an pawimawh hle a, eng hna pawh thawk ila, rinawmna leh taihmakna nen neih fan fan a hun tawh hle nia ahriat thu a sawi. Chhim lam chu Mizoram kawtchhuah a ni tan mek tih tarlangin, hemi kawngah pawh lo inbuatsaih that a tul hle a, a bik takin Lawngtlai mipuiten tih tur an ngai hle a, theihtawp chhuah turin a fuih a ni. Ram leh hnamah chian a pawimawh hle tih tarlangin, hnam ziarâng chawikan kawngah I harh thar ang u tiin a sawm a. LADC- ah sawrkar ngelnghet tak a awm a pawimawh hle a, chu chu mipuite duhdan pawh a ni tiin, chak taka LADC kal zel a beisei thu a sawi a, Mizoram sawrkar nen chak zawka thawk tlang zel turin duhsakna a hlan nghal bawk.

Khualzahawm Dr. Lorrain Lalpekliana Chinzah, Adviser to Chief Minister chuan Lawngtlai District - mipuite tana hmasawnna ruhrel lian tak peihfel a ni chu lawmawm a tih thu a sawi a. A hman tangkai leh enkawl kawngah erawh rilru sen a ngai dawn hle a, Duat leh uluk taka enkawl leh hman tangkai a tul dawn hle a ni, a ti. LADC hotute mawhphurhna pawh a sang dawn hle tih tarlangin, theihtawp chhuahho turin LADC, VC leh NGO te a sawm a ni. Residential School chuan Infiammite tan bungthar a thleng tur thu sawiin, Girl's Hostel leh Sadbhav Mandal te pawhin rah tha a chhuah ngei a beisei tih a sawi.

Khualzahawm Pu C. Ngunlianchunga, Lawngtlai West bialtu MLA chuan a bial chhunga hmasawnna ruhrel tha tak a awm chu lawmawm a tih thu a sawi a. LADC ngeiin a enkawl chhunzawm tir chu ropui a tih thu tarlangin, tha leh uluk taka enkawl a pawimawh hle a ni, a ti. Neitu thinlung put pawimawhna sawiin, MLA chuan Lawngtlai mipuite neitu diktak an nihna hriaa duat taka enkawl turin a sawm a ni.

Pu C. Lalsawmzuala, CEM, LADC, chuan Residential School, Lawngtlai, LADC kutah hlan a ni chu ropui a tih thu sawiin, Mizoram Sawrkar leh Mizoram State Sports Council chungah lawmthu a sawi a. Lawngtlai mipuite an ngaihven kawngah hlu a tih thu tarlangin, Laifate tan ni chhinchhiah tlak tak a ni, a ti a. A enkawl kawngah LADC chuan theihtawp a chhuah tur thu a sawi a ni. 

Pu James Lalramnghaka, Asst. Engineer, Mizoram State Sports Council chuan Technical Report a pe a. Residential School, Lawngtlai hi Ministry of Minority Affairs hnuaia PMJVK Scheme 2019- 2020 atanga cheng nuai 3461.70 hmuh niin Work order amount chu Rs. 3149.84 lakhs a ni a.Contractor hi DJ Consultancy Services, Mission Veng, Aizawl, Decor Ondia, Guwahati, Assam te niin, ni 8, March 2021 khan hnathawh tan niin, ni 8, September 2025 khan zawhfel a ni. Residential School ah hian Academic Building, Boy's Hostel, Girl's Hostel, Principal Quarter, Teachers/ Staff quarter, Multipurpose Hall, Artificial Turf Football Ground - te a awm a ni. Sadbhav Mandap, Lawngtlai sak nan hian Ministry of Minority Affairs hnuaia PMJVK Scheme 2018- 2019 atangin cheng nuai 236.0O hmuh niin Work order amount chu Rs. 214.74 lakhs a ni a, M/s Excell Consultancy Services, Mission Veng, Aizawl ten hna an thawk a ni. Hna hi ni 19, December 2021 khan tan niin, ni 15, February, 2024 khan zawhfel a ni. Girl's Hostel Lawngtlai, sak nan hian Ministry of Minority Affairs hnuaia PMJVK Scheme 2019- 2020 atanga cheng nuai 3461.70 hmuh niin Work order amount hi Rs. 257.32 lakhs a ni a. Ni 22, July 2022 khan hnathawh tan niin, Ni 30,November 2025 khan zawhfel a ni. Girl's Hostel, Chawngte work amount Rs. 257.32 lakhs niin, M/s Excell Consultancy Services, Mission Veng, Aizawl ten an thawk a. Ni 21, July 2022 khan hna tan niin, ni 30, January 2026 khan zawk fel a ni.

Home Minister hian Residential School chu LADC hnenah hlan nghalin, Girl's Hostel Lawngtlai, hi Govt. Lawngtlai College hnenah hlan a ni a, Girl's Hostel Chawngte chu Govt. Chawngte College hnenah hlan niin Sadbhav Mandap chu 'Management Board' kutah hlan a ni bawk.

Vawiin hun hmannah hian Mizoram sawrkar leh LADC Official - te, Sports Discipline hrang hrang hruaitute an tel tha hle a, Pu K. Lalthanzara, Executive Secretary, LADC chuan lawmthu sawina neiin hun a khar.