4827/2025-2026

Dated Serchhip, the 13th March, 2026: Vantawng Group YMA huaihawt in vawiin chawhma dar 11 atang khan Thenzawla Lothazawl ah Chapchar Kut 2026  chu 'Aia upa te zah thiamin, an thu te awihin zawm fo rawh' tih thupuia hmangin ropui taka hman a ni a. He hun hi Pu Lalnghinglova Hmar Minister of State, Sport & Youth Serviced/Tourism/Excise & Narcotics/LESDE Department chuan 'Kut Pa' niin a hmanpui.

Vawiina Lothazawl Thenzawla Chapchar Kut 2026 'Kut Pa' Pu Lalnghinglova Hmar hian thu sawiin, Pathian in hnam tin a hrang theuh in min din a, kan awmna hmun tur theuh min pe bawk, hnam hrang hrang te chuan Kut hrang hrang kan nei a, Mizo ten kut kan neih zinga lawm hlawh ber leh kan nghaihhlut ber chu Chapchar Kut hi a ni a ti. Kut thupui 'Aia upa te zah thiamin, an thu te awihin zawm fo rawh' tih anih angin thuawihna a keng tel a ni a ti a, Mizoten tun hnaia kan tlakchham tak thuawihna hi chhungkua a kan chenhona ah te, kan hnathawhna ah te kan thupui hian min zirtir nawn leh se a duh thu a sawi.

Chief Minister bial Thenzawla Peace City din tur chungchang pawh sawiin ruahmanna thui tak a kal tawh thu a sawi a; Tourism Department hnuaia hmalakna pawh sawilang in, Ministry Of Tourism hnuaiah 'Model Tourist Destination' atan Thenzawl khua chu thlan a nih thu hmalakna kalpui mek a nih thu a sawi, Ministry lamain Project an pawm a nih chuan Tourism Project lian tham tak Thenzawl ah kalpui a nih tur thu te, Ministry of DoNER hnuai ah Lengpui Aizawl Thenzawl Model circuit ruahman mek anih thu te, Vantawng khawhthla enna tur leh a chhehvel a infrastructure dinna turin cheng Vbc. 35 (Nuaih sangthum zanga) pawisa dawn anih tawh thu leh bul tan thuai tum anih thu a sawi bawk. A sawizelna ah Irrigation leh Water Resources-te nen tangkawpin Vantawng Tuirihiau Integrated Water Conservation and Eco Tourism Project siam a ni a, hemi atan hian cheng Vbc 9 nuaih 84 dawn tawh a nih thu a sawi bawk a, Thenzawl a Golf Course thuamthatna tur PM Devine hnuaiah thahnem tak duan niin DPR thehluh tawh a ni a Ministry of DoNER in an endik mek a, an pawm anih chuan Golf Course chu a lian zawk leh changtlung zawk a siam a nih tur thu a sawi bawk. Heng bakah hian CSR Project atangin Thenzawl ah Home Stay 10 din anih tur thu leh Thenzawla Tourist Lodge sak thatna tur pawisa dawn a nih thu a sawi bawk.

Vawiina Chapchar Kut hmanna hmun Lothazawla phullem phahna tur pawisa a awm tawh thu te, tender chhuah a nih tawh thu leh contractor pawh thlan an nih thu sawiin kumin April thla ah chuan phullem phah hna tan a ni dawn tih a sawi bawk.

Thenzawl chu Handloom khawpui a ni a, Mizoram hmun dangah chuan Thenzawl puan tah an bih mek lain Thenzawl khua chuan mahni deuh chhuah nge in bih thei a, a ropui tiin tradition chhawm nung tu, eizawnna tlak a chawinung tu khua an ni chu lawmawm a tih thu a sawi bawk a; Kut lawmpui nan Organising Chairman Pu C. Lalnunthara thilpek a hlan bawk.

Vawiina Thenzawl a Chapchar Kut 2026 hmanna ah hian Kut thlengtu chu Pu C. lalnunthara, President Vantawng Group YMA a ni a, Thenzawl Cultural Club, MCO Branch bakah Vantawng Group YMA hnuaia Branch YMA hrang hrang ten hnam lam chi hrang hrang an entir bakah zaithiam te hnen atang malzai ngaihthlak a ni a, Chapchar Kut Miss leh Naupang thuam nalh/Mizo thuam inhmeh te thlan an ni bawk.