4828/2025-2026

Lunglei, 2026 Vau thla ni 13: Vawiin khan Chawngte Khelmualah Young Mizo Association (YMA) Chawngte Group huaihawtin Chapchar Kut hman a ni a. Lunglei South bialtu MLA Pu Lalramliana Papuia chu Kut Pa niin, Chawngte Sub-Divisional Officer (Civil) Pu Lalnunpuia Renthlei chu Kut Thlengtu a ni.

Kut Pa Pu Lalramliana Papuia chuan kut hmangtute Chapchar Kut chibai bukin duhsakna a hlan a. Mizo hnam kengtu chu Mizo mipate an nih angin, hnam nun tizahawm a, timawi tur leh hnam ral loh nana mawhphurtu lian zawk pawh mipate an nih thu sawiin, Mizo mipate chu ram leh hnam innghahna tlak ni tura ṭan la turin a chah a. Chapchar Kut thupui chu "Zo nun ze mawi — Inremna" tih a nih angin, Mizoram chhunga hnam dang chengte nen pawh inrem taka nun ho a pawimawh tih sawiin, hetih lai hian Mizo hnam bil tana ruahman thilte erawh hnam dang nena inzen ṭawm rem lo chin a awm tih hriat thiam a ngai a, Mizo anga hamṭhatna kan neihte hnam dangin min chuhpui a thiang lo, a ti.

Kut Pa chuan Mizo pi leh pute chu mahni intodelh tuma taima taka hna thawk ṭhin leh an thawh rah ngei ei ṭhin, ṭhenawmte nena inrem taka awm hram hram tum ṭhin an nih thu sawiin, pi pute'n an lo nunpui hnam nun ze mawi tak chu ṭhangtharte'n chhawm nun zel a pawimawh thu a sawi a. Hnam lam leh incheina hmang chauhva Mizo zia lantir tum lovin, Mizo nun zia chu nun chhuahpui zawk tur a nih thu sawiin, Zo nun ze mawi — Inremna leh nun ze mawi dangte chhawm nung zel turin kal khawmte a chah.

Vawiina Chawngtea Chapchar Kut hmanah hian Kut Thlengtu Pu Lalnunpuia Renthlei chuan thuhma sawiin, Chakma Mission Director Rev. Dr C. Lalruatthanga'n hunserh a hmang a. Organising Committee Chairman Pu ZD Ramngamzaua'n inlawmna thu sawiin, YMA, MHIP leh MUP te'n hnam lam chi hrang hrang — Cheraw, Chheih lam, Chawnglaizawn leh Sarlamkai bakah, hlado chham, hnam zia pho lanna leh hman lai Mizo nun lantirna lemchan te an entir a. YMA Chhang te'n pawnto entirin, zaithiam hrang hrang — J. Lalrosanga, Siampuii Ralte, Thangromawia leh Youngfella bakah, tualchhung zaithiamte zai ngaihthlak a ni bawk.