4829/2025-2026

Lunglei, 2026 Vau thla ni 13: Vawiin March ni 13, 2026 (Zirtawpni) khan Chapchar Kut chu Lungleia C. Ṭhuamluaia Mualah hlung taka hman a ni a. Lunglei High Powered Committee (HPC) Vice Chairman Pu V. Malsawmtluanga chu Kut Pa niin, Lunglei District Bawrhsap Pi Navneet Mann chu Kut Thlengtu a ni.

Kut Pa Pu V. Malsawmtluanga chuan kut hmang tura kal khawmte leh Lunglei District mipuite Chapchar Kut chibai bukin, Chapchar Kut chu inrem, hlim leh lungrual taka khawtlang mipui zawng zawngin an hman ho ṭhin a nih angin, a awmze ril tak ngaihtuah chunga hlim taka hmang turin mipuite a sawm a. Pi leh pute hunah ziaka thil chhinchhiah thlap thlap a awm loh avangin Mizo chanchin leh thil hluite duhthusama hriat kim theih a ni lo va, hei vang hian Mizoram sawrkar chuan ṭhangtharte'n kan history kimchang zawk kan hriat chian theih nan Chief Minister kaihhruaina hnuaiah "Hnam Ṭobul Zawn Chhuah Committee" a din tih sawiin, sawrkar chuan Mizo thil hlui chhui chhuah bakah, hnam ziarang, nunphung leh tih dante humhalh, chawi san leh tihhmasawn kawngah theih tawpin hma a la chho mek tih a sawi a. Sazaikawnah District Museum Lunglei building thar ṭha tak hawn thar a nih thu sawiin, he Museum-a thawktu mamawhna phuhru turin kumin chhungin Curator, Museum Guide, Museum Assistant, Clerical Staff leh IV Grade post eng emaw zat siam turin dil leh bawhzui mek a nih thu te, ram dang mi khualzin Mizoram tlawhtu pung zel chu kawng hrang hranga ei zawnna remchang thlentu tur a nih avangin he lama ei zawnna bul ṭan tumte tan sawrkarin Bana Kaih (Handholding) Scheme leh scheme hrang hmangin loan a pek chhuah bakah, tourism hmasawnna tura hma a lak mek zel thu a sawi a. Ram dang mite'n kan hnam tih dan a taka an hmuh theih nan leh khualzin hip nan Inrinni tin Falkawnah "Living Museum" buatsaih ṭhin a nih thu sawiin, hei hi ṭhalaite leh naupang zawkte'n tlawh tamin, hnam ziarang leh nunphung hriat thar deuh deuh nan hmang se a duh thu a sawi.

Kut Pa chuan Mizo pi leh pute'n nun ze mawi tak vawng tlat a, induhsak leh mi pawi sawi hlau tak, mi dang nen inrem loh palh hlauva thu khuh taka ṭawngkau an chhep ṭhin te chu hre thar a, inṭhenawm khawvennaah te, ei zawnna hmunah leh ni tin nunah chhawm zel turin kal khawmte a chah a. Chapchar Kut chu pi pute hman anga hnam thil leh nun ze mawi chawi sanna leh zir tharna ni atan leh rilru leh taksa hahdamna ni atan hmang turin duhsakna a hlan a. Zo nun ze mawi chu khualzinte hmuh chak, hnam ro thil hlu tak a nih avangin vawn him a, chhawm nun zel a pawimawh thu sawiin, Zo nun ze mawi — inremna, tlawmngaihna, induhsakna leh ai upa zahna te chu uar lehzuala chhungkua leh khawtlangah inzirtir a, ram dang leh hnam dang mit hmuha nunpui leh tar lang zel turin ram mipuite a sawm a ni.

Kut Thlengtu Pi Navneet Mann chuan Mizo ṭawngin inlawmna thu sawiin, Chapchar Kut hmang tura kal khawm zawng zawngte kut chibai a buk rualin duhsakna a hlan a. India rama hnam, chi, ṭawng leh sakhua chi hrang hrangte chu inrem taka awm ho tur kan nih thu sawiin, kan inan lohna hriat thiam a, inzah tawn chu inremna a nih thu a sawi a. Ram hmasawn nan inremna a pawimawh thu sawiin, ram dang, hnam dang, sakhaw dang, veng dang, kohhran dang, pawl dang, chhungkaw dang leh mi dang nen inrem tawn a, ramngaw, nungcha, lei, tui, boruak leh kan chenna khawvel leh mahni taksa nen ngei pawh inremna siam zel turin kal khawmte a chah a. Mizo hnam thuam mawi tak te, zai leh lam mawi tak te, Mizo ṭawng leh nunphung te chu humhalh a, chhawm nung zel tur leh Zo nun ze mawi — Inremna nunpui zel turin kut hmangtute a chah.

Lungleia Chapchar Kut lawmna hun hi Lunglei Sub-Headquarters Young Mizo Association (YMA) Vice President Pu CMS Dawngliana'n a kaihruai a. Mizoram United Pentecostal Church (UPC) Southern Zone Secretary Rev. Gospelthanga'n hunserh hmangin, Lunglei Sub-Headquarters YMA Zaipawl te'n hawnna hla, "Ro min relsak ang che" tih an rem a. Mizo Upa Pawl (MUP) General Headquarters Lunglei te'n hlado chhamin, tlang an tlir a. Sub-Headquarters YMA Cultural Troupe te kaihhruaiin YMA branch 19 (bu 23 ) te'n a huhovin Cheraw (Buh-za-aih) an kan a. Organising Committee Secretary, Sub-Headquarters YMA Secretary Pu Zothanzuala Hnamte chuan lawm thu a sawi a. Kangmei Ven Chawlhkar (Fire Prevention Week) 2026 puala Lunglei District Committee on Fire Prevention (DLCFP) buatsaih lem che (reels) insiamsiak lawmman sem nghal niin, pakhatna Hmingchungnunga (Electric Veng, Lunglei), pahnihna Israel Lalhriatkima (Salem Veng, Lunglei) leh pathumna HC Vanlalawmpuia (Farm Veng, Lunglei) te an ni.

Pu Lalbiakdika leh Nl. KC Lalthanzuali te kaihhruaiin Chapchar Kut lawmna hun hnihna (Hnam Pual) hman chhunzawm a ni a. Mizo Hmeichhe Insuihkhawm Pawl (MHIP) Sub-Headquarters Lunglei te'n Chhepchher lam entirin, Mizo Cultural Artistes' Association (MCAA), Sub-Headquarters Lunglei te'n Solakia an entir a. Zobawm MCO Salem te'n Sakei lu lam entirin, MCAA SHQ Lunglei kaihhruaiin YMA branch 18-in Tlanglam entirin, Sub-Headquarters YMA Cultural Troupe-in Khuallam an entir bawk a. Mizo Cultural Organisation (MCO) General Headquarters Lunglei leh MCO branch 10 te'n chai entirin, mipui chaia chhunzawm a ni.

Chapchar Kut zai rimawi hunpui (concert) buatsaih chhunzawm niin, zaithiam hrang hrang — Lalsangliana (Taitea), Ruatpuii, Becky Fanai, Chama Thangluah, F. Zomuanpuia, Feli Hauhnar, H. Rosangliana, Lalenkawli Pautu, R. Lalhmangaiha, R. Lalvensanga leh Vanrammawii Pautu te'n zaiin kal khawmte an awi a. Chapchar Kut 2026 House Band te'n zai hi an rem a ni.

Lungleia Chapchar Kut lawmnaah hian department hrang hrang — District Rural Development Office (Mizoram State Rural Livelihoods Mission), Agriculture & Farmers Welfare, Horticulture, Commerce & Industries, Khadi & Village Industries leh Lungsen BDO (MzSRLM) bakah, an hnuaia Self Help Group (SHG), kut hna thawktu leh thil siam chhuaktute'n an thil thar chhuah leh siam chhuahte pho chhuakin, kut hmannaa kalte mamawh leh duh zawng lei theihna tur dawr (stall) hrang hrang 27 hawn a nih bakah, naupang intihhlimna hmun (Kids Zone) buatsaih a ni bawk.

Organising Committee-in Chapchar Kut Lanu leh Kut Hraite (Hmeichhia leh Mipa) 2026 thlan chu Lunglei Photographers' Association (LPA) kuta a dah angin, Chapchar Kut hmannaa hnam thuam inbela kal nula leh naupang aṭangin Kut Lanu leh Kut Hraite hi thlan a ni a. Lunglei Chapchar Kut Lanu 2026-ah Jenny Malsawmtluangi (Chanmari) chu thlan a ni a. Kut Hraite (Hmeichhia)-ah Zomuansangi Tochhawng (Lunglawn) leh Kut Hraite (Mipa)-ah S. Malsawmkima (Venghlun) te thlan an ni bawk.

Lungleia Chapchar Kut hlawhtling taka hman a nih theih nana tha leh zung sengtu zawng zawng chungah Kut Organising Committee chuan lawm thu a sawi.