4830/2025-2026 

Dated Khawzawl, 13th March, 2026 : Mizo te’n kut kan neih zinga kan ngaihhlut ber te zing ami Chapchar Kut chu vawiin khan Khawzawl Field No. 1 ah hman niin, Champhai North bialtu MLA leh Adviser to Chief Minister (Technical) ni bawk Er. H. Ginzalala chu Kut Pa niin a hmanpui a, Kut Thlengtu chu Sub-Headquarters YMA President Pu PC Rosiama niin “Zo Nun Ze Mawi – Inremna” tih thupui hman a ni.

Kut Pa, Er. H. Ginzalala chuan thu sawiin Khawzawl District-in Chapchar Kut hmang tura an sawm chu lawmawm a tih thu sawiin chibai a buk a, pi pu te’n hlim taka an lo hman thin Chapchar Kut chu induhsakna, inhmangaihna leh inthianthatna lantirna hun a nih angin Mizo history-ah a pawimawh em em a, inremna atan leh hun hlimawm taka hmanna hun a nih thu a sawi. He kut hi Mizo hnam tana a hlut em avangin Zo hnahthlak zawng zawng te’n zau zawk leh ropui zawka hman a nih theih nan sorkarin theihtawp a chhuah thu a sawi a, ram dang atang pawhin Zo hnahthlak unau te pawhin he kut hmang tur hian an lo kal thin thu leh Sorkar pawhin theihtawp a chhuah zel tur thu a sawi. Thangthar te’n a hlut zia hre zel turin leh kan Kristian-na nen a inthlunzawm tlat a nih zia hriaa chhawm nung zel turin a sawm a ni.

Kut Thlengtu Pu PC Rosiama chuan inlawmna thu sawiin Kumin thupui ‘ Zo nun ze mawi- inremna’ in a tarlan angin vawiina lo kal khawmte leh Khawzawl District hmun hrang hrang a Chapchar Kut hmangte karah inremna a awm theih ngei a beisei thu a sawi. Addl. DC, Pu K. Zorammuana’n lawmthusawina hun a nei bawk.

Chapchar Kut 2026 lawmna hi nimin, ni 12 atanga hman tan tawh niin, Concert te lo neih tawh a ni a, Zaithiam lar hmun hrang hrang atangin an rawn tel a, vawiin hian Khawzawl District chhunga YMA branch hrang hrang atangin hnam lam chi hrang hrang entir a ni a, heng bakah hian Miss Zirsangpuii, Miss Mizoram 2020 team te atangin item hrang hrang entir a ni bawk a, Chapchar Kut 2026 pual hian Khawzawl District, Miss Chapchar Kut   thlan chhuah niin Miss Chapchar Kut atan Ida Malsawmtluangi d/o Eliza Lalhmingthanga Sailo, Khawzawl Vengthar Branch chu tlan a ni a, 1st Runner up- Lalrinchhani d/o Lalchawiliana, Khawzawl Darngawn Branch leh 2nd Runner up - Lalsawmzuali d/o Vanlalsawma(L), Biate Branch te thlan chhuah an ni a, heng bakah hian naupang thuammawi te thlanna neih bawk niin lawmman pawisafai leh Citatation hlan a ni bawk. Tin, zan lamah pawh programme hlimawm tak hman chhunzawm tum a ni.