1730/2023-2024

Aizawl, the 1st September 2023: Vawiin khan Auditorium of Taxation Department-ah Home Minister Pu Lalchamliana hovin Sairang Zero Point bula Railway Leidawh chim avanga chhanchhuah hna leh ruang senghawi hna thawktute inhmukhawmin an hnathawhdan te leh sawihona(Debriefing )an nei.

Home Minister Pu Lalchamliana chuan tunhnaia Rel kawnga leidawh lai chim avanga Mizoram chhunga chhiatna rapthlak tak lo thleng chu pawi a tih thu a sawi a. Khuarel Chhiatrupna chu thil lo thleng thei leh dan rual a nih loh thu sawiin mihring siam chawp chhiatna lo thleng thin te erawh a tam zawk chu kan pumpelh theih thil a ni a ti.

Hmasawnna ruhrel pawimawh tak relkawng siam mek a vanduaina lo thleng chungchangah chhanchhuah hna thawktute, a hnua ruang senghawi hna thawktute leh ruang thawnchhuah hna thawh dan te thlir letin thawktute'n hna tha tak an thawk niah a ngai a. He hmalakna kalpui dan sawihona leh thlirletna hian chhiatrupna dang a lo thleng thulh a nih pawhin remhriatna leh awmze nei zawk a hnathawh dan turah ngaihtuahna fing zawk min pe dawn a ni a ti.

He vanduainaah hian Chief Secretary leh a hnuaia Secretary, DM&R, Aizawl Bawrhsap, SP leh SP Traffic, a chheh vela YMA, VC te, khawtlang hruaitute leh Mipuite, NDRF, SDRF, DC office hnuai QRT te, BSF te leh state police te'n hna tha tak an thawk a. Nunna hlu tak 3 chhanchhuah hna hautak leh hlauhawm tak tlin taka thawktu Mizo tlangval te huaisenna leh themthiamna a fak tel bawk a ni.

DM&R in a mamawh hmanrua te a theih anga tihchangtlun zel a nih dawn thu a sawi a. Tunah hian hetiang Chhiatrupna lo thlenthulh a tangkai em em, Drone Lian chi pawh lei tum a ni a ti.

DM&R Minister chuan Leimin avanga harsatna tam zawk chu pumpelh theih a ni tih a sawi a. Kan state leilung chu a nghet loa, chuachhapah Lirnghing tamna, Seismic Zone 5 a awm ka la ni leh zel a. Insak leh lei laih chungchangah pawh thuneitute khap ngai lovin Kan fimkhur tlan a ngai a ti a. Tuitla an tam ta lutuk chu a zia lo tih sawiin hemi chungchangah pawh mipui inzirtirna atan Lian tham deuhin program huaihawt tum a ni a ti.

Keynote Address sawitu Chief Secretary Dr Renu Sharma chuan Sairang Zero Point bula Vanduaina thleng an hriattirna atanga sawrkarin chet a lak dan te a sawi a. Chhanchhuah hnathawktu - NDRF, SDRF, QRT, Medical team leh official te thataka khawtlang mipuiin an thlawp chu state dangte tana entawn tlak a ni a ti a. A bik takin vanduaina thlenna hmuna lo thleng hmasa YMA member te chungah lawmthu sawiin an hnathawh dan chu ropui a tih thu leh an chhuanawm thu a sawi.

Debriefing session sawihawngtu Pi K. Lalrinzuali, Secretary, DM&R hnen atangin search and rescue kalpui dan, team hrang hrang te thawhona leh he program huaihawt a nih chhan te ngaihthlak a ni bawk.

Debriefing session on Response During Collapse of Railway Bridge (under construction) at Sairang hi Pu Benjamin Lalzama'n a kaihruai a. He hunah hian chhanchhuah hna thawktute chawinawina hun hman a ni a. Chhanchhuah hna thawktute lam atangin a hnuaia tarlan ang hian a indawtin report pek a ni a. Hei hi sawihona in a chhunzawm a. Pi Saizikpuii, JD, DM&R in lawmthu sawiin huntawp a khar thung.

Sairang Zero Point bula Rel kawnga Lei dawh chim a chhanchhuah hna thawktute zingah chawimawina dawngtute.

Aizawl DDMA and QRT, Superintendent of Police, Aizawl District, Superintendent of Police(Traffic Police), Forensic Science Laboratory, CMO West & Civil Hospital, Aizawl, SDRF from 1st & 3rd MAP, 5th IR, 1st Bn NDRF, 38th Bn BSF, Mizoram Police Dog(Canine) Squad, CYMA, YMA leh VC, Sairang, Sairang Dinthar leh Sihhmui.