1729/2023-2024

Dated Aizawl, the 1st September, 2023: Vawiin khan ICFAI University, Mizoram chuan an University Auditorium ah Freshers' Social, 2023 an buatsaih a, Chief Minister Pu Zoramthanga chuan khuallian niin he hun hi a hmanpui a, tun hnaia Mizoram chhehvela zofaten harsatna an tawhna kawng hrang hranga a hnathawh that avangin chawimawina thuziak an lo hlan.

Thusawiin khuallian chuan, Fresher Social hi zirlai naupang lo awm tawhsa leh lut tharte inhmelhriatna hun tha a ni a, zirlai tharten boruak nuam tak nen bul a tan theih phah thin a ni. ICFAI in Campus tha leh zau tak in nei hi in vannei hle a, Mizorama University din duh institution dangte pawh an awm nual a, hmunhma tha in neih ang hi an duh ve hle a ni. India sawrkar nena inremna kan siam khan University din hi ziah tel a ni a, state sum atanga hetiang zirna in lian leh tha din hi a hautak em em a ni. Kan inremna ang ngeiin Mizoram University tha tak kan nei taa, tunah phei chuan India ram huapa zirna in tha a lo tling ta hial a kan chhawr em em a ni. Mahse Mizoram University pawhin kan mamawhna min dawl zo tawh lova, tihlen zel tumin hma pawh kan la mek a ni. University Seat mamawhna a san em em laiin ICFAI in rawn langa, sawrkarin phalna pein in han indina; kan ramin kan chhawr em em che u a, Mizoram tan in tangkaiin a lawmawm em em a ni, a ti. Mahni state chhungah ngei, boruak ralmuang leh zalen taka zir thei a an awm chu an vannei hle tih hrilhin zirlaite chu tha taka zirchhuaka, hlawhtling tura bei a, chhungkua, ram leh hnam tana mi tangkai tak nih tum tlat turin a fuih a. Ruihhlo leh a kaihhnawih nunkawng tha lo te laka fihlim a, Pathianin anmahnia a dah theihna ropui tak awm te a taka hmang chhuak turin a chah a ni.

Dr. David Lawmzuala, Registrar, ICFAI University pawhin thusawiin, zirlai tharte an lawmna inkhawm Chief Ministerin a telpui theih avangin an lawm hle tih a sawi a. An University chanchin tlangpui tarlangin New Education Policy zuiin kumin atangin an Course Structure an thlak vek a, Programme Course 12 an kalpui mek a, kumin atangin an University ah hian Ph.D a zir theih tawh dawn a ni. Zirlai lut tharte chu kawng laka pil bo mai lova tha taka an zirlai te zo ngei turin an beisei tih a tarlang a ni.

Freshers' Social inkhawmah hian C. Lallianthangi, SEU in hunserh a hmang a, zirlai naupang tharte lawmna leh inhmelhriattirna thil chi hrang hrang an buatsaih a ni.

ICFAI University Mizoram hi Section 4(2) of the Institute of Chartered Financial Anslysts of India University, Mizoram Act, 2006; Mizoram Legislative Assembly in a passed behchhana din a ni a, Chaltlangah mimal in luahin bul an tan a, 2011 kum atangin tuna an awmna Durtlang North-a an Campus ram 17.58 acres a zauvah ah hian an insawn leh a ni. Tunah hian zirlai 630 an awm mek a, thawktu hi Assistant Professor 28 leh Guest Lecturer 30 neiin, an zinga zaa sawmsarih hian Doctorate Degree an nei a ni. Non Teaching Staff te nen thawktu zawng zawng hi mi 92 vel an awm mek a ni.