Home Minister Pu R. Lalzirliana chuan a bial Tawi Constituency chhunga NLUP beneficiary-te hnenah vawiin khan Agriculture Department hnuaia NLUP 3^rd leh 4^th Phase tanpuina leh AH & Veterinary Department hnuaia NEDP-NLUP Convergence Scheme installment hmasa ber a sem; hemi rual hian PRRS hrileng avanga Tawi Cluster chhunga NLUP vawk thi 82 ralna hlan nghalin, SIRD&PR kaltlangin Rashtriya Gram Swaraj Abhiyan (RGSA) scheme hnuaiah Tawi Constituency chhunga Village Council 15 hnenah Computer Set leh printer a hlan bawk. He programme hi Saitual Block Resource Centre (BRC)-ah neih a ni.

Home Minister chuan Sorkar atanga a thlawn a hamthatna dawn te hi hmang riral mai lovin, chhungkaw dinchhuahna atan mahni hmakhua thlir reng chunga thahnemngai taka hman tangkai hi kan bat a ni, tiin NLUP tanpuina dawngtute chu tanpuina an dawn dik taka hmang turin a chah a. NLUP vawk thi ral chungchangah chuan sorkarin chhungkaw harsate an intunnun na tur ruahmanna a siamsak kaltlanga vawkte dawngtuten vanduaithlak taka PRRS hrileng avanga an chan ta chu pawi a ti a, Sorkarin a ngaihsak tih lantirna atan ralna hi a ruahman a ni, Pu R. Lalzirliana chuan a ti a. SIRD&PR kaltlanga VC te hnenah computer leh printer sem a ni chu lawmawm a tih thu sawi telin, state hmasawnna atana SIRD&PR hnathawh chu tangkai a tih thu a sai bawk.

Minister Pu R. Lalzirliana chuan inkalpawhna kawng chhia tam lutuk chungchangah siam tha turin Sorkar a inpeih reng tawh thu leh, a thawktu turte pawh work order siam sak ni tawhin, thawh theih hun nghah mek a nih thu a sawi a; ruah tui han mai loh avanga hna tan theih a nilo chu pawi a tih thu leh, Sorkar pawhin hemi chungchangah hian mipui hriatthiamna a ngen tih a sawi a ni.

Vawiin NLUP tanpuina sem ah hian Agriculture Department hnuaiah Tawi Cluster chhunga khua 11 atangin beneficiary 82 (3^rd Phase-ah 68, 4^th Phase-ah 14) hnenah tanpuina pek niin, WRC-I ah beneficiary 38 (3^rd Phase ah 32, 4^th Phase ah 6) hnenah Rs. 39,000 theuh sem a ni a; WRC-II ah beneficiary 40 (3^rd Phase ah 32, 4^th Phase ah 8) hnenah Rs. 28,000 sem niin, Fu (Sugarcane) chingtu beneficiary pali (3^rd Phase) hnenah Rs. 20,000 theuh sem a ni. Heti hian Tawi Constituency chhungah chuan Agriculture Department hnuaia NLUP tanpuina sem la hmabak zat chu 3^rd Phase hnuaiah Rs. 20,32,000 leh 4^th Phase hnuaiah Rs. 4,48,000 a ni.

Hrileng vanga NLUP vawk thi ralna hi State Fund atangin Sorkarin AH & Veterinary Department kaltlanga sem turin cheng nuai 30 a dah a, Vety Dept. chuan in report hun tur a siam chhunga in report a chhinchhiah danin NLUP beneficiary 88 (vawk 353) ralna pek tur Mizoram pumah an awm a, Tawi Constituency chhungah hian beneficiary 82 (vawk 185)-te hnenah ralna hi hlan a ni. Vawk pakhatah Rs. 500 zel ralna hi pek a ni. NEDP-NLUP Convergence Scheme hnuaiah hian First Installment-ah beneficiary tin tan Ar vulh tanpuina Rs. 52,740 leh Vawk vulh tanpuina Rs. 36,000 pek a ni a, Tawi Cluster chhungah hian ar vulh thlangtu pahnih leh vawk vulh thlangtu pariat an awm a ni.

RGSA scheme hi tualchhung inrelbawlna tihchakna kawnga Village Council-te thuam thatna tur atan State Institute of Rural Development & Panchayati Raj (SIRD&PR) hmalakna a sem a ni a. Sorkar laipuiin inrelbawlnaah 'digitization' a ngaih pawimawh chhoh em avangin khawtlang inrelbawlnaah pawh computer neih a pawimawh hle a. SIRD&PR chuan a thawhkhat naah RGSA hnuaiah hian Village Council (VC) 126 ah computer set leh printer a sem dawn a ni.

Vawiin programme hi Pi Zothankimi, District Agriculture Officer, Aizawl in a kaihruai a, Home Minister hi Pi Maria CT Zuali, Director, SIRD&PR, Pu R. Thangthuama, DVO, Aizawl District leh Pu Lalchhanhima, Thingsul BDO bakah officer dangten an tawiawm a ni.