Vawiin khan Horticulture Minister Pu PC Lalthanliana chuan Lawngtlai District-a khaw pahnih – Bualpui NG leh Lungzarhtum khuate’n fur zikhlum (off-season cabbage) an thar chhuah chu Siaha leh Lunglei lama zawrh turin a vai liam.

Vai liam hmaa inkhawm tawi buatsaihah Horticulture Minister Pu PC Lalthanliana chuan Bualpui NG leh Lungzarhtum khaw mipuite thawh rimna chu fakin, an khua chu zikhlum thar tam khua tia hriat an nih reng tawh tur thu a sawi a. Horticulture Department chu kut hna thawktute ngaihsak leh a ti tak tak peihte chawi kan tuma thawk thin an nih thu sawiin, Bualpui NG leh Lungzarhtum khuate pawh Department-in theih tawp chhuaha an tanpui thin thu a sawi a. Hun bik neia thlai thar chuan a hralhna lamah harsatna a thlen thin avangin, ram changkang zawkte tih anga kum tluana thlai thar chhuah reng theih dan chu Mizoramah pawh kan uar chhoh deuh deuh a tul a ni, a ti a. Sumchang thlai thar chhuah lama kan intodelh phawt chuan ram dang atanga lak luh teuh teuh a ngai lo mai ni lovin, thawn chhuak zawk hial thei turin kan ram hi a tha tawk a ni tiin, mahni tualchhung thar ngei chu a tuiin hrisel pawh a hrisel zawk a, kan ngaihsan deuh deuh pawh a tha a ni, a ti bawk.

He inkhawm tawi buatsaih hi Lawngtlai Divisional Horticulture Officer Pu L. Lalhmingmawia Pachuau chuan kaihruaiin, inlawmna thu a sawi a. BCM pastor Rev. C. Vanlalhruaia’n hunserh hmangin, Horticulture Development Officer Pu Hunlawmawma chuan Bualpui NG leh Lungzarhthum khuaa fur zikhlum (off-season cabbage) chin a nih dan leh Horticulture Department-in an buaipui dan te a sawi a. Bialtu MDC, Adviser to CEM ni bawk Pu K. Vanlalsanga, Horticulture Department Joint Director Pu Rosanglura Ralte leh zikhlum chingtute ai awhin Bualpui NG VCP-II Pu Hranghluna te pawhin thu an sawi a. Sangau Circle Horticulture Officer Pu F.Liannuaia’n lawm thu sawiin hun  khar a ni.

He hunah hian Lungzarhtum leh Bualpui NG khuaa Horticulture Department hnuaia NEDP tanpuina dawngtu chhungkaw 26 te hnenah tanpuina pawisa fai Rs 18,900/- theuh (a zavaiin Rs 4,91,400/-) sem nghal a ni a. He’ng tanpuina dawngtute hi fur zikhlum chingtute an ni a, hemi hma hian Rs 49,950/- theuh pek an lo ni tawh a ni. Hemi hnu hian Minister hian zikhlum truck trip 2 (quintal 40) chu Siaha leh Lunglei lama zawrh turin a vai liam nghal a. He'ng zikhlum te hi Silchar leh phai lam hmun dangah pawh thawn chhuah tlaka tha a ni. Horticulture Minister hian Bualpui NG khuaah hian NEDP hnuaia Pu Ramropuia zikhlum huan siam chu tlawh nghalin, zikhlum seng hun tan chho mek chu a sengsak ve nghal bawk.

Lawngtlai Horticulture Division hma laknain Bualpui NG khuaa chhungkaw 70 vel leh Lungzarhtum khuaa chhungkaw 60 vel chuan fur zikhlum (ryozeki) hi chhungkaw ei zawn nan an hmang a. Horticulture Department hian NEDP, Article 275 leh MIDH scheme kal tlangin hma an lakpui a ni. He’ng khaw pahnih te hian nikum 2016 khan zikhlum quintal 2000 dawn lai an thar chhuak a. Kumin hian quintal 600-700 vel seng tawhin, quintal 2100 chuang thar chhuah theih an inbeisei a ni.

Vawiina hun hmannaah hian Minister hi LADC leh MADC-a member te, Congress party hruaitute, Horticulture, Industries leh I&PR lama official leh chanchinbumite’n an tawiawm a ni.