Vawiin khan 'Spoken English Course for Higher Secondary School Students, Lunglei' kharna hun Government Higher Secondary School Lunglei-ah buatsaih a ni a. He course awm theih nana bul țantu Pu Joseph Lalhimpuia, MLA Lunglei East chuan a hmanpui.

Pu Joseph Lalhimpuia chuan ' Sapțawng leh țawng reng reng hi inbiakpawhna tur a ni, kan pianpui țawng anih loh phei chuan hlauhna a awm tel țhin a, inbiakpawhna hmanrua ani tih hre rengin hlau lovin ngam takin țawng dang te hi i hmang țhin ang u' tiin zirlai te a fuih a. Kan theihna te, kan ngaituahna te hnam dang zinga duh ang taka pho chhuak thei lo turin kan țawng thiam lohna in min dal leh țhin a, mahse țawng hi zira thiam theih a ni, a ti. Pu Joseph Lalhimpuia chuan zirlaite chu chanchinbu, TV leh thil dang te ngaihlu turina fuih a, Sapțawng lehkhabu te chhiar tam a pawimawh a ni a ti. Tunhmain Chhim lamah hian mithiam hmasa tam tak an lo chhuak tawh a, tunah pawh hian theihna haichhuah tur ro phum ruk tam tak a la awm a, țhalaiten keimahnia theihna awm te i hai chhuak zel ang u a ti bawk.

Pu Joseph Lalhimpuia chuan Govt Leitlangpui HSS classroom siam belh nan Rs 20 lakhs dah anih thu leh GHSS Lunglei tan additional class room sakna atan Rs 35 lakhs dah a nih thu a sawi bawk. Govt High School Lunglei building pakhat chu zirtirtuten a him tawk lova an ngaih avangin Disaster Management mithiam ten an endik hnuin luah tlak loh ani tih an finfiah avangin Building sak țhatna turin Rs 100 lakhs (DONER) dah anih thu leh chumi belhchhahna tur Rs 75 lakhs Education Dept Minor Works atangin dah sak an ni a ti bawk.

He hunah hian Course zirzo te aiawhin Govt Leitlang Higher Sec.School naupang pakhat leh G.H.S.S naupang pakhat ve vein an zirna an hlawkpui zia an sawi a ni. Pu PC Vanlalruata Course co-ordinator chuan Spoken English Course hi Mizoram Institute of Spoken English, SCERT & District Education Office te țangkawpin an buatsaih anih thu sawiin Mizoram chhunga Higher Secondary zirlai te tana buatsaih vawikhatna anih thu a sawi a. 22nd August 2017 ațanga țanin chawlhkar 3 chhung an zir a. Govt Leitlangpui HSS leh GHSS Lunglei ațangin zirlai 87 ten course țha takin an zo a, Khuallian hnen ațangin certificates leh study kit an dawng vek a ni.

 

Attachment

  • Loading attachment...