Tukin dar 8:00Am khan Horticulture Minister Pu PC Lalthanliana chuan No-aotlah (Niawhtlang)-III a Strawberry chingtute harsatna tawh a hmunah tlawhin a enfiah. No-aotlah-III hi Strawberry thar tam avanga Mizoram pumpuia hriat hlawh khua kha an ni thin a. Nikumah pawh khan cheng nuai Rs.50/- vel an lei chhuak a ni. Kuminah erawh chuan a hun lovah ruahtui a tlak tam lutuk avang leh sik leh sa inthlak danglam nasa lutukin Strawberry chu Natna (Verticilium sp.Fungal) leh White Grub in a bei nasa a, za a sawmriat vel chu a thi a. Sawrkar chuan Strawberry chingtute harsatna chu hriain, NEDP hnuai atangin an Strawberry chinna hmunah zikhlum (Off-Season Cabbage) chinna turin ruahhmanna siampuiin mi 22  hnenah tanpuina a pe a ni.

Zikhlum chi hi mi pakhat hnenah a tahtawlin 200gms zela pein, tunah hian an pek hmasak ho chu an seng theih tep tawh a ni. NEDP hnuaiah hian zikhlum hi 2,93,300  vel phun a ni a, 2,933 quintal vel thar thei tura beisei a ni. Kg-ah Rs.30/- zela an hralh chuan cheng nuai Rs.87.99/- vel lei chhuak theih turin an in beisei a ni.

Horticulture Minister Pu PC Lalthanliana chuan  an Strawberry tam vek mi 22 hnenah an Terrace laihna tur atanga 50%  in mi pakhat zelah Rs.24,970/-a pe hlawm a. A vaiin Rs.5,49,340/-tanpuina a sem chhuak a ni.

Pu PC. Lalthanliana chuan NEDP tanpuina sem programme-ah thu sawiin, NEDP chu tang puina tih a kan lo sawi tawh thin angin, No-aotlah-III a Strawberry chingtute hi mi tang, rinawm tak leh taima taka hnathawk thin in nih tih sawrkarin a hria che u a, in harsatna tawhah pawi kan ti a, nangmahni tanpui turin ke kan lo pen vat a ni. Kuthnathawktu rinawm leh taima, tih tak tak a hnathawktu te laka sawrkar rilru put hmang leh thleibik a neih lo ziah chu No-aotlah-III a Strawberry chingtu te hi a hre chiang bertu  tur in ni.   Rinawm tak leh Tihtak takna nena hna thawktu tanpui tur hian sawrkar hi a inkau reng a ni, a ti.

Strawberry chingtu ten  Strawberry hlawhtling taka an thar lai hmupui turin Horticulture Minister hian nikum lamah khan No-aotlah-III hi a lo  tlawh tawh a. Tuna harsatna an tawh mek lai hmuhpui tura an mahni a tlawh leh hlawm chuan No-aotlah-III a kuthnathawktute a ti lawmin, an thlamuan phah hle a.  Minister Pu PC.Lalthanliana'n  kut hnathawktute a ngaituah zia leh an hma a ngaihzia a lang chiang hle a ni, an ti.

Horticulture Minister Pu PC.Lalthanliana'n No-aotlah-III a tlawhna-ah hian  Horticulture Department atangin  Pu Rosanglura Ralte, Jt.Director,, Pu  Vanlalruata Chenkual, Deputy Director, Pu Vanlalnuntluanga Renthlei, DHO Lunglei leh Pu CH.Lalmuanpuia, DHO  Siaha ten an tawiawm a. LADC atangin Pu L.Lawmkima EM (Agri) leh Vanlalsanga, Adviser to CEM ten tawiawmin, MADC atangin Pu.K.Chhuabei, EM (RD), K.Pawhnie EM (Agri) leh S.Tiahlei, Vice Chairman Town Planning ten an tawiawm bawk.

Minister Pu PC Lalthanliana hian No-aotlah leh Bualpui'Ng' a tlawh hnuah Siaha-ah let lehin, Pu Zakhu Hlychho ruangah  Parthi a dah nghal a ni.