Nimin chawhnu khan Home Minister Pu R. Lalzirliana chuan cheng nuai 6 senga Seling Branch YMA in YMA Library an sak chu a hawng a; he library hi Raja Rammohan Roy Library Foundation atanga tanpuina hmuh atanga sak a ni.
Pu R. Lalzirliana chuan library hi Mizote rualawhna berte zingah a mi a ni tiin Seling Branch YMA in Library tha tak mai an sa chu lawmawm a tih thu a sawi a, hmang tangkai turin veng mite a chah bawk a. Zirna(Education) hi investment tha tak mai a nih thu sawiin library chu chumi atan chuan thil tangkai tak a ni a ti bawk. He hunah hian Home Minister chuan Lal Thanhawla tih lehkhabu Pu David M. Thangliana ziah bu hnih; Zofest 2012 Souvenir ‘Insuihkhawm’ bu li; leh Remna atana Zirlaite Hmalakna tih bu khat te chu Library enkawltute a hlan bakah Library tan a tul anga hman turin cheng sing khat a hlan tel bawk a ni.
NLUP chungchang sawiin Home Minister chuan eizawnna ngelnghet mipui in an neih theihna tur atana Sawrkarin hma a lak puih ah hian theihtawp chhuah a tan la turin NLUP tanpuina dawng tawh te chu a chah a.NLUP hmasa dawngte hlawhtlinna chu entawn turin a fuih bawk a ni. Tanpuina dawng tawh inthlahdah leh hmang dik lo te chu tanpui zui chi an ni lo a ti bawk. Pu R. Lalzirliana chuan Krismas leh kumthar lo thleng turah tumah halpuah leh halmawi hal lo tura chahin, Lal Isua chauh rilrua vawng chunga Krismas leh kumthar hmang turin duhsakna chibai a buk a ni.
He hunah hian Seling khua a kumin chhunga mi 27 thi te chhungte hnenah ralna a hlan a. Hetiang bawk hian nimin zing vek khan Home Minister Pu R.Lalzirliana chuan Thingsul khua kumin chhunga mi 32 thi te chhungte hnenah ralna a hlan bawk a ni. Ralna programme ah te hian Pu R. Lalzirliana chuan chhiatni a in tawrhpui leh in sunpui hi Mizo tih dan anih thu leh hei hi Mizo nih tih nuamtu anih thu a sawi a ni.
