Kum danga tih thin ang bawkin Transport Minister Pu P.C.Zoramsangliana kaihhruai Coordination Committee on Traffic Management chuan kumin Krismas leh Kumthar vuakvetah Aizawl khawpui chhungah ‘No Vehicle Zone’ neih leh a rel a. No Vehicle Zone hi December ni 21, 22 leh 31 ah chawhma dar 10:00 atanga tlai dar 4:00 inkar chhungin Zodin Square atanga Hrangbana College, Chanmari inkar kawngpuiah neih a ni dawn.

No Vehicle Zone in a huam chin chhungah hian mipui kal vel tibuai thei heng BMX leh Trolley khalh bakah kawngdungah thil nepnawi/thawmhnaw leh a dangte zawrh phal a ni lova, a huam chhungah hian Concert leh a kaihhnawih mipui tibuaithei chi reng reng stage siam ang chi huaihawt phal a ni lo.