Vawiin hian Home Minister Pu R. Lalzirliana chuan Chhiahtlang khaw daia Serchhip District Jail thar, mi 165 tan theihna tur Rs. 686 Lakh senga sak chu a hawng.

A hawnna thu sawiin Minister chuan, he District Jail hi sawrkar hmasa te bul lo tan tawh Pu Lalthanhawla sawrkarin a chhunzawm tak a ni a, bul lo tantute chungah leh hawn theiha peih a nih theih nan tha thawhtute zawng zawng chungah lawmthu ka sawi a, misual leh sualna hi duhlo mah ila khawvelah a pun chhoh zel si avangin ram mipuite him nan leh rorelna dik leh fel tundina a awm theih nan Jail hi kan neih a tul thin a ni, a ti. Pu R. Lalzirliana chuan, Jail hi misualte hremna hmun a ni ngawt lova misualten nun phung pangai an zawhtheih nan leh an nun khua atana thiamna leh hriatna an chhar belh theihna hmun a ni a, a pawimawh hle a ni, a ti bawk. Jail hmun tur ram nuam tak petu Chhiahtlang mipuite chungah lawmthu a sawi a ni. Kan rama sualna leh sualna tam tak kaichhuaktu ruihhlo do beihpui thlakna kalpui mek a nih thu sawiin Minister chuan, he Ruihhlo Do Beihpui thlak nan hian YMA, Excise leh Police Department te chu thawk hovin beihpui an thlak mek a, sawrkar pawhin hemi atan hian sum a pek theuh tawh thu a sawi, khawtlang nu leh pa, tlawmngaipawl hrang te leh kohhran hruaitute chu he beihpui thlaknaa thawhpuiah a sawm a ni.

District Jail hawnna inkhawmah hian Inspector General of Prison, Pi Zoramthangin Hauhnar chuan an hnathawh dan report a pe a, kum 1999 a Chhiahtlang khawtlangin a hmun tur ram 54.15 Bighas (34683 Sqm) a zau an pekah hian Jail Modernisation Scheme sum Rs 270 Lakh hmanga bul tan a ni a, 13th Finance Commission sum Rs. 416 Lakh hmangin chhunzawm leh a ni. Security Main Wall hi tehkualin 230 mtrs a sei a ni a, hemi chhungah hian mipa leh hmeichhe tanna daidanna lung bang a awm leh bawk. Mi tangte awmna tur Building 4, Ward 8 nei a awm a, Jail Manual in a sawi danin mi pakhat dahna tur hi 3.71 sqm (Feet 6 bial vel) a nih avangin he Jail ah hian mipa 125 leh hmeichhia 40, an vaiin mi 165 vel tang thei tura ngaih a ni. A enkawltute awmna tur leh hmun pawimawh dangte nen a hung chhungah hian Building 9 a awm a, thawktute leh vengtute awmna tur a hung pawn lamah Building 27 a awm thung. He Jaila thawk tur hian kum 2014 khan sawrkar in thawktu mi 25 a lo la tawhin tunah an training chhuak vek tawh a. Armed Security Guard engemawzat Mizoram Home Guard lamin an dah nghal bawk.

District Jail hawnna inkhawmah hian Home Minister tawiawmtu Nl Lalawmpuii Chawngthu, MLA, Chairperson, Mizoram Women Commission pawhin thu sawiin Home Department hnuaia hmasawnna lian tak tak hmuh tur awm chho reng mai chu lawmawm a tih thu a sawi a. Women Commission anga vawi tam tak Jail an tlawh tawh thu leh Mizoram Jaila hmeichhe tang tam takten Jail an hman tangkai zia a hmuh tawh thu sawiin Jaila thawktu leh Department hotute chungah lawmthu a sawi a ni.

He inkhawmah hian Serchhip Bawrhsap Dr. Lalrozama, IAS, pawhin thusawiin District Administration felfai tak a awm theih nana peng pawimawh em em mai Jail kan nei thei ta hi a lawmawm hle a, hei hian District rorelna kawng tam takin a tiawlsam dawn a ni. A awmna ram neitu Chhiahtlang tan chuan lawmna tur emaw hlawkna tur emaw a tam lo pawh a ni thei a, amaherawh chu kan District hi a lawmin a hlim a ni, a ti. Ani bakah hian Serchhip District Chief Judicial Magistrate Pu Lalngaihmawia leh Chhiahtlang VCP Pu CR Dothanga ten thusawina hun an hmang bawk a. Jail thar hawnna inkhawm hi Pu Lalbiakzama, Addl Secretary, Home Department chuan a kaihruai a, inkhawm kaihruaitu hian tun thla September 23 velah Mamit District Jail thar pawh hawn tum a nih thu sawiin Home Department hmalakna pawimawh hrang hrangte a tarlang nghal bawk.

Vawiin Serchhip District Jail thar hawnna ah hian zaithiam leh lamthiam ten kalkhawmte awiin hun an hmang hlawm a, Aizawl atanga Official pawimawh engemawzat bakah Serchhip District Officer zawng zawngte, Chanchinbumite, Chhiahtlang khawtlang hruaitu leh khaw mipui thahnem tak he hunah hian an tel a. Pu K. Lawmthanga, DIG Prison chuan lawmthu sawina neiin a hawnna inkhawm hi a khar a ni.