Vawiin (15.09.2016) chawhma dar 11 khan Krishi Vigyan Kendra (KVK), Lawngtlai chuan Lawngtlai DC Conference Hall-ah thlai chi humhalh leh kut hna thawktute dikna chanvo humhalh (Protection of Plant Varieties and Farmers Rights Act, 2001) chungchangah awareness cum training a buatsaih a. Lawngtlai DC Dr A. Muthamma chu Khuallian a ni.
Khuallian chuan Lawngtlai District-a cheng tam zawk chu kut hna thawka ei zawng an nih avangin lo leh huan neih leh a kaihhnawih lamah theih tawp chhuaha hma lak a tul thu sawiin, KVK Lawngtlaiin kut hna thawktute ngai pawimawha training an buatsaih chu lawmawm a tih thu a sawi a. MGNREGS, IWMP leh sawrkar policy dang dang kal tlanga kut hna thawktute tana ham thatna awm theite chu mipuite'n chhawr tangkai thiam a tul thu a sawi. DC chuan ran vulh leh bawnghnute thar chhuah kawnga district intodelh ni turin AMFU-in hma la se a duh thu sawiin, Lawngtlai District chhung chhim lam mite chu a bik taka ngaihtuah an tul thu a sawi a. Kut hna thawktute harsatna hrang hrang sut kiansak tura a inhawn reng thu a sawi bawk.
He hun hi KVK Lawngtlaia Senior Scientist & Head Dr Michelle C.Lallawmkimi'n a kaihruai a. Lawngtlai District Agricultural Officer Pu H.Joela pawhin thu sawiin, thlai chi roh a tul thu leh Mizo thlai tui bik ang chite chu theih ang tawka vawn that a tul thu a sawi.
He hunah hian lo neitute hnenah hmasang atanga thlai chi tha leh danglam bik kan lo neihte chhinchhiahtir (register) pawimawhna leh hnam dangin a neitu nihna min chhuhsak mai loh nana inven dan PPV & FR Act 2001 zirtir an ni a. KVK Scientist Pu C.Rualthankhuma leh Pu Malsawmkima Vanchhawng te'n zirtirna hi an pe a ni.
Hetah hian KVK Lawngtlai chuan Sentetfiang Bee Keeping Association hnenah khuai khawi bawm (modern bee box) pasarih an pe a. An khawizu bura bel tur labelling thar a thlawna an siamsak chu DC-in a tlangzarh nghal bawk. Sentetfiang khuaah hian hlawhtling takin khuai an khawi mek a, khawizu pawh kum tin thahnem tak an thar chhuak thin a ni.
He hunah vek hian Vety leh Agriculture free clinic buatsaih a ni bawk a. A thlawnin ran vulhtu leh lo neitute tan damdawi chi hrang hrang sem nghal a ni.
