No.7954/2020-2021

Aizawl, 30th March, 2021 : Mizoram Handloom & Handicrafts Development Corporation Ltd.(ZOHANDCO)buatsaih, ‘Special Vendors Development Programme(VDPs) under National SC/ST Hub Scheme’ chu vawiin khan Home Minister Pu Lalchamliana’n Aijal Club ah a hawng.

He Scheme hi Ministry of Micro, Small & Medium Enterprise hnuaia mi niin vawiina he Scheme hawnna ah hian Tourism, AH&Vety, Food Corporation of India leh Agriculture Department atanga mithiam ten trade hrang hrang hnuaia vendor thlan chhuah te hnenah zirtirna(presentation)an pe a ni.

Khuallian Pu Lalchamliana chuan hnam hnufual Scheduled Caste leh Scheduled Tribe te hmasawnna tura VDP duan a nih dan tarlangin he programme hian Mizorama kut hnathawktu te tan hmasawnna a thlen ngei a duhsak thu a sawi a. Intodelh kawngah hma sawn turin kut themthiamna hmanga thil deh chhuah tihpun leh thawn chhuah kawngah nasa zawka tan lak a tul hle a ni, a ti a. Mizo kut chhuak handloom leh handicrafts te chu hnam dangte pawhin an ngai hluin ram zau zawka thawn thei thei tura deh chhuah tihpun a tul thu a sawi. Pu Chama chuan Mizo hmeichhia ten hma an sawn nasa hle tih sawiin VDP hmangtu zinga hmeichhiate chu eizawnna kawngah hmahruaitu ni zel turin a chah a. Ram hmasawnna leh hma lam hun dinhmun chu mipui te ngaihhlut zawngah a innghat thui hle tih sawiin Pu Chama chuan politics kan thlir dan te, kan nitin hnathawh leh eizawnna ah te, rinawmna ngaihlu a, thawhrimna kan ngaihsan chuan ramin kawng dikah hma a sawn ngei ang, tiin a sawi.

VDP hawnna programme hi Pu C.Lalrammawia, Chairman ZOHANDCO in a kaihruai a. India hmarchhak state tlangrama chengte tan industry lian neih a harsat avangin Micro & Small industry pawimawhna tarlangin heng industry tenau zawka vendor ten an thil siam an hralh chhuah theihna tur kawng lo zawn sak chu he scheme-in a tum a ni tih a sawi a. He programme ah hian Pu Lalthlengliana, Chairman ZIDCO, Pu Lalthanliana, Chairman MKVIB leh Pu Ramhluna, Vice Chairman Bamboo Development Board te pawh an tel a ni.