No.7955/2020-2021
Kolasib dated 30th March 2021: Vawiin chawhma khan Pu K.Lalrinliana, Local Adminitration Department Minister chuan Rastriya Gram Swaraj Abhiyan (RGSA) hnuai a Panchayat Bhawan, Electric Veng, Kolasib hawnna hun a hmang a, Pu Lalchawimawia, Joint Director, LAD, Pu ST Lalhmingmawia, DLAO, Kolasib district department a hotute, Kolasib Town Joint Village Council hruaitute leh NGO hrang hrang hruaitute an tel a ni.

LAD Minister Pu K.Lalrinliana chuan Mizoramah chuan Panchayati Raj inkaihruaina zawm famkim chiah ni lo mah se, Village Council ruangam kalpui danah PRI kalphung tam tak chu zawm ve tan a nih tawh thu a sawi a, VC term pawh kum 5 a nih tawh thu leh seat awm zat ang zelin hmeichhiate tan seat zuah sak thin a nih thute a sawi a ni. Village Council chu mipui rorelna tichiangtu leh tichaktu a nih angin, VC hruaitute chu an thuneihnate tangkai tak a hmang turin a chah a, chumi tur chuan an mawhphurnate hrechiang tur a chahin VC house chu mipuite tan a rorelna langtlang siamna hmun a hmang turin a fuih nghal bawk a ni.

Pu K.Lalrinliana chuan ei leh bar a intodelh a pawimawh zia sawiin,” Kan unau zohnathlakte tanpui tur pawhin kan intodelh hmasak a ngai a ni,” a ti a, hripui leng avang a ramri khar a ngaih chang pawh a buaina awm lo turin mitinin kan phak tawk theuh ah intodelh tur a hma kan lak a tul thu a sawi.

Pu Lalchawimawia, Joint Director, LAD chuan RGSA scheme kalpui a nih dan tlangpui sawiin Panchayat Bhawan sak bakah SIRD kaltlangin khawtlang hruaitute hnenah zirtirna hrang hrang pek an nih dan turte leh an inrelbawlna tur hmanraw changtlung zawk chhawpchhuah sak an nih tur thu a sawi a. RGSA hmang hian kum 2019-20 chhung khan Panchayat Bhawan 5 sak zawh a ni a, a dang sak chhunzawmna tur hian hmalak mek a nih thu a tarlang bawk a ni.

Pu R.Lalsiamliana, VCP, Electric veng chuan Panchayat Bhawan hawnna hun hi kaihruaiin mipui rorelna a tak a hman a nih a, mahni inrelbawl thei turin leh ruahman tha siam a nih theihna turin Panchayat Bhawan, Electric Veng, Kolasibin an nei ta chu lawmawm a tih thu sawiin India danpui lungphum pawimawh tak, Democracy, mipui rorelna tihchak lehzualna hmanraw tangkai tak a nih ngei a beisei thu a sawi.

Panchayat Bhawan, Electric Veng, Kolasib hi RGSA scheme hnuai a cheng nuai 20 seng a sak a ni a, bialtu MLA Pu K.Lalrinliana’n Electric Veng YMA-te Community Hall sakna tur atana a pekna hmun, ram awl la awm chu YMA-te hian VC-te hnenah an pe ve leh thung a ni.