Students' Self Support Union (SSU) din champha vawi 25-na Chanmari YMA Hall-a neihah vawiin khan Home Minister Pu R Lalzirliana chu khuallian niin Pu Lalrinmawia Ralte, Parliamentary Secretary chu khualzahawm a ni.

Khuallian chuan SSU chu  Pathian rinchhan a din, a hming a mawi ang bawka sum duhnate, lansarh chakna te leh duhamna tel lova thianghlim taka kal zel tura a duhsak thu a sawi a. Zirlai nih lai atanga intodelh tum te tan chuan  hmabak a eng a ni a ti a. Nakin lawka  ram hruaitu la ni mai tur zirlai te hian zu leh ruihtheihthil, zuk leh hmuam te laka insum a vawiin atanga inbuatsaih turin a sawm a, SSU te thil tum, zirna atana mahni intodelh leh kut hnathawh chawikan chu fakawm a tih thu a sawi a ni. Pu Zira chuan kan zirna ti hmasawn tur leh mi awh khawp ni tura kan zirna hmunpui chawinung tur pawhin zirtirtu thiam leh tha ber ber Mizo ni kherlo te pawh kan lak a tul a ni a ti a. A thiam leh tlingte hmun kan pek chuan Mizo zirlai hlawhtling kan chherchhuak ang a ti.

Khualzahawm Pu Lalrinmawia pawhin thusawiin Pathianin thahnemngai taka thawktute chu a pui thin a, thawh tam loh chuan a hlawhtlin theih loh a ni a ti a, SSU te chu Silver Jubilee an thlen theih avangin  a lawmpui thu a sawi a ni.

SSU hi May ni 27, 1985 khan C Lalhluna, 1st yr B.Com, Hrangbana College hoin zirlai thahnemngai ten an din a. Khatih laia Hrangbana College Principal Pu R Zatlaia'n College a din a lo remtihsaka, an hming pawh hi ama phuah a ni nghe nghe. Tunah chuan Mizorama school leh college tin deuhthawah a lo ding ta a ni.