Vawiin khan Home Minister Pu R. Lalzirliana’n Reiek RD Block ‘Students’ Meet’ Community Hall, Reiek-ah a hmanpui a. Reiek Village Council leh MZP Sub-Hqrs Reiek buatsaih niin Pu V.L Robiaka, MLA (Dampa Constituency) chu Khualzahawm a ni.

Home Minister Pu R. Lalzirliana chuan zirlaite hnenah ‘Thawhrimna atang chauhin hlawhtlinna tluantling a awm thei a ni’, a ti a. Hlawhtlinna tluantling tu leh fate chhawr tur kan neih theuh theih nan tan lak a ngai a ni, a ti a. School luhlai atangin tum fel tak neih a ngaih thu sawiin chhawrtlak ni ngei tura lehkha zir a pawimawh thu a sawi a. Zirlaite chu nakin lawka ram hruaitu tur an ni tiin ngaihtuahna hmang thiama, mi puitlinga chhuak ngei turin kalkhawmte chu a fuih a. Zirtirtute pawimawhna sawiin ram leh hnam siamthatu an nih thu a tarlang a. Zirlaite hnenah chuan in naupan lai atanga in mizia hian in upat hnua in mizia tur a hril a ni tiin nun uluka hriselna lamah pawh fimkhur turin a chah a. Zirlaite nena inhmuhkhawmna hun tha tak buatsaih a ni chu lawmawm tiin an kal zelna turah duhsakna a hlan bawk a ni.

Khualzahawm Pu V.L.Robiaka chuan students’ meet tha tak neih a ni chu lawmawm a tih thu a sawia. Nu leh pa bakah zirtirtute thu kan awihna rah hian mihring puitlingah min siam a ni, a ti a. Thuawih chu hlawhtlinna bul a ni tiin hun danglam ang zela inher thiam turin zirlaite chu a fuih a. Hlawhtling ngei tura zir hi zirlaite hian kan tihtur a ni tih kan hriat reng a ngai a ni, a ti.

Programme hi Reiek VCP Pu Vanlalchhuanga chuan a kaihruai a. Reiek MZP President Lalawmpuia Renthlei chuan kalkhawmte lawmna thu a sawi a. MZP General Office Bearer tharte lawmpuina hun neih a ni a. MZU Gold Medalist Zothanzuala Zote, MA (Public Administration), MZU Silver Medalist C.Lalmuanpuia, MA (Public Administration), Badminton-a India No. 1(Veteran) Pu Lalthanzuala leh ‘MZP Chanchinbu Article of the year 2017’ latu Joel Lianhmingthanga chawimawina leh lawmpuina hun hman a ni a. High School level Essay Competition leh Middle School leh Primary School level Painting Competition-a tithate lawmman pekna hun hman a ni a. Pi Lalmuankimi Chuaungo, Protection Officer, District Child Protection Unit, Mamit atangin thusawi ngaihthlak a ni a. Item hrang hrang- solo, group dance, group singing, short play leh recitation zirlaiten an entir bawk a. Reiek VC Treasurer Pu Zarzokima’n lawmthu sawina in hun a khar a ni. Reiek RD Block-a school hrang hrang zirlai leh zirtirtute an tel a ni.