Vawiin khan Education Minister leh Bialtu MLA ni bawk Pu H.Rohluna chuan Kawlbem Community Hall-ah ‘Siamsin Pawl Pi Conference’ ni hnihna a hmanpui.

Khuallian Pu H. Rohluna chuan kalkhawm zirlaite chu nasa taka an zirlai zir a, thiamna tak tak nei a, an tui zawng taka hlawhtlin nan tan la turin a fuih. Zirlai tam tak chu zirlaiah an tui tawk loh vangin an hlawhchham fo a, zirlai tuichilh tur khawpa zir a tul a, hriatthiamna tak tak nena an zirlai chu luhchilh turin a chah bawk. Lehkhazir a ni emaw kut themthiamna lam emaw pawh nise chhungkaw chawm theihna tur khawpin an tuina lamah ngawrh taka beiha eizawnna tling tur khawpa thiamna nei turin taimak chhuah a pawimawh ber a ni, a ti. Tunlai khawvel thanchho zelah skill developement a pawimawh tulh tulh a, chuvangin thalaite chu chhawrtlaka an eizawnna kawng tur an thlanah theihtawp chhuah turin a chah.

Bialtu MLA Pu H. Rohluna chuan Kawlbem khua a leiminin a tihchhiat in sakthat nan chhungkaw 2 hnenah cheng 1,11,900 ve ve a hlan nghal bawk a ni.

Siamsin Pawl Pi Conference hi nimin ni 9.11.2017-a tan tawh niin a ni khatna chu Ngopa BDO Pi Lalhruaitluangi leh Saitual SDO, PHE Pu Sangromuan ten hmanpuiin Swachh Bharat Campaign hun hman a ni. Conference-ah hian zirlai pawl dang MZP leh MSU hruaitu thenkhatte pawh telin khawmpui chhimtu zawng zawng hi mi 300 chuang an ni.