Nizan khan Home Minister Pu R. Lalzirliana’n ni 4 awh Zodin Plastic 19th Mizoram Official Taekwondo Championship chu Ramhlun Indoor Stadium ah a kharna programme a hmanpui a, infiam mite chu an nun vawng thianghlim turin leh thil thalo lakah fihlim turin a chah.
Home Minister Pu R. Lalzirliana chuan taekwondo thiam naupang rual he hunah fuankhawm te chu kawng engkimah an nu leh pate thu awih tura fuihin nu leh pate thu awih leh an mahni zah chu malsawmna bul a ni tiin a fuih bawk a. Mizo te pumrua chu te mahse Pathian rinchhana thil kan tih a, Pathian beiseina nen amah kan nghen a, theitawp ka chhuah zel chuan khawvel huapa inelnaah kan la lang ngei thei ka beisei a ni, a ti a. Sawrkar in infiamna lamah hmathlir tha tak a neih thusawiin 2016 Olympics a Mizo te kan tel ve theihna turin theihtawp chhuahin tan kan la a, mahse duh ang tawka hlawhtlinna kan hmu ta lo chu pawi ka ti a ni, a ti a. He Championship a tel naupangte chu infiamna lamah dinhmun sang zawka inhlankai turin theihtawp chhuah zel turin chah a ni.
Championship kharna inkhawm hi Pu Lalrinawmna, Organizing Secretary chuan a kaihruai a, Technical Report Pu Joseph Thansanga, MATA General Secretary hnen atangin ngaihtlak a ni a, Pu Thansailova, RSC President leh Dr. Rualkhuma Colney, MATA, President ten thu an sawi bawk a. Demonstration hmuhnawm tak MATA Mission Team in an entir a, hemi zawh hian lawmman semna hun neih zui nghal a ni.
He Championship ah hian District 8 atangin Club 25 telin, taekwondo infiami 530 bakah official 30 an tel a. Team Champion chu Ramhlun Sporting Club niin Runners Up chu Aizawl Taekwondo Academy an ni a, Best Fighting spirit team atan Sports Authority of India thlan an ni. Most Promising team chu Lunglei District niin Best Discipline team chu Thenzawl an ni. Best Fighter Mipa chu Jonathan F. Lalhmingmawia ATA Electric Veng niin Best Fighter Hmeichhia chu Lucy Lalthazuali, Kolasib District Amateur Taekwondo Association a ni a, Best Referee atan H. Lalmalsawmna, Dawrpui thlan a ni. Mipa player naupang ber chu Stephen Laldinmawia, RSC niin hmeichhe player naupang ber chu Mary R. Lalparmawii ATA Electric Veng te a ni a, an pahnih hian kum 4 ve ve an ni.
